भांगरभूंय | प्रतिनिधी
भांगरभूंय दिसाळ्यांतल्यान विखुरील्लीं पानां, होमखण लेखांचें घरांतल्यान लिखाण करतना लॅपटॉपाचो व्हड उपेग जाता. लॅपटॉपाचीं कालचीं, आजची व्हड रुपां आनी आयज मोबायल- लॅपटॉप जावप हे व्हड बदल. विज्ञान आनी तंत्रगिन्यान खिणाखिणाक बदलता, एक पान बरयता म्हणसर दुसरें शेणटा असो कालचो तेंप आयज ना, जतनाय आसा.
गोंय मुक्ती उपरांतचे उदरगतीचो नियाळ करतना आमची जैव आनी सैमसंपदा शेणल्या, दोंगरय शेणल्यात, आमची म्हादय, मांडवी आमचीच लेखांचे होमखणय जालें. मूळचें खबरांकार आशिल्ल्यान चड सत, थोडें मीठ मिरसांग घालून. संपादकांक विचारपाची गरज पडली ना. अदीं मदीं म्हजेंय चुकलें तेन्ना तांणीं चुको सुदारल्यो, माफ करात म्हणून मेकळेपणान लिखाणांतल्यान सांगलें. चूक जाल्यार तशें सरळ संपादकांक सांगचें ही देख आमचे पत्रकारितेंतले गुरु ज्येश्ट पत्रकार चंद्रकांत घोरपडे हांणी घालून दिल्ली. वरिश्ठ पत्रकार चंद्रकांतबाब केणी, गोंय विधानसभेचे पयलींचे आमदार, पत्रकार अॅड. उदयबाब भेंब्रे हाणीं पत्रकारितेंत येवपाक, फुडें वचपाक वाट दाखयली. गुरुपुनवेचो तांकां आमचो सलाम.
आतांचे भोवमाध्यमी पत्रकारितेची वाट वेगळी, आमची न्हय पूण ते फुडें तेच वाटेवेल्यान वतात. दिसाळीं भोवमाध्यमांतल्यान विदेशांत पावतात. पयलीं परस चड सर्कस आतांच्या पत्रकारांक, मीडीयाक करची पडटा. दिसाळ्यां खातीर खबर कंपोज, मॅसेज करतना सोशल, डिजिटल, व्हिज्युअल मीडीया मेरेन ती बेगीन पावयता मेरेन खरस मारता. धा पावलां चलात, भलायकी सांबाळात इतलेंच तांकां सांगुया.
अंदूंच्या पावसांत उपाट भरून व्हांवपी न्हंयो किदें सांगतात? आमच्या तळाक, मुळाक कितें गेलां तें सरकारान पळोवचें हो रकाद म्हादय, मांडवी दिता? हवामान खात्यान धाडिल्ली मेसेज गोंयचे मुख्यमंत्री विधानसभेंत वाचून दाखयतात. हुंवार येता, सादूर रावात, दोन वर्सांच्या गिन्यानांतल्यान तुमी बोवाळ घालूंक सोदतात, आमीय घालतले ही तांची कळोवणी. सत्तेचे गुरु आदले मुखेलमंत्री मनोहर पर्रीकार, फकत आय-आय-टी-यन न्ही जाल्यार संवसारांतल्या शंभर आय-आय-
टीयन्सांतले एक. रेंव, खणींचीं न्यायालयातलीं गणीतां न्हंयो फुगोवपी? हुंवाराचीं ? तेच कुवाडें सोडोवंक शकतले आशिल्ले, आतांच्या सरकाराक तांचीं विधानसभेंतलीं भाशणां वाट दाखयतलीं.
इंजिनियरिंग गुरु मुश्टीफंड आरयन उच्च माध्यमिकचे संचालक व्यंकटेश प्रभुदेसाय, मास्टेकाचे अशांक देसाय हेय संवसारांतल्या शंभर आय-आय-टीयन्सांतले गोंयकार. तांकां पद्मश्री, गोमंतभूशण मेळपाक जाय. ज्ञानपीठकार दामोदर (भाई) मावजो हांकांय पद्मभूषण मेळचें. राजकी वक्ल कुशीक दवरून तांचो वावर जोखचो.
अंदूं १७ ऑगस्टाक वरिश्ठ पत्रकार लक्ष्मीदास बोरकार हांचें जल्मशती वर्स सुरू जाता. ल्हान खबरो, खबर चुकल्यार स्तंभलेखनांतल्यान म्हायती दिवप तांचो मार्ग. तांकांय सलामी मेळटलीच.
उमास, पुनवेच्यो तारखो मोबायलार मेळटात, गुरुपुनवेक गुरुची याद दिसाळींय करतात, गुरुचो भोवमानय जाता. गुरुपरस विद्यार्थी आयज एक पावल फुडेंय पावल्या आसत हातांत मोबायल सगलो वगत दवरून.
शिक्षणावेळार शिक्षण, मनरिजवणेवेळार मनरिजवण, खेळावेळार खेळाक म्हत्व मोबायलान दिल्यार? सगलें एकाच वगतार मेळ्ळ्यार कितें करचें तें कळना. आजची पत्रकारीता तशीच जाल्या, ऑल इन वन. संपादप्याक खबरांकार, उप संपादपी, खबरां संपादपी, स्तंभलेखक, फोटोग्राफर, टी व्ही संपादपी, डिजीटल संपादपी. संपादपी चंद्रकांतबाब केणी, चंद्रकांत घोरपडे, उदयबाब भेंब्रे, लक्ष्मीदासबाब बोरकार, सुरेशबाब वाळवे हांणी तरणाट्या लेखकांक, खबराकारांक उर्बा दिली. यादींतले संपादपी तांच्या शिश्यां खातीर फकत गुरु न्ही गुरुर साक्षात परब्रह्म जातात. कांय शिक्षक पत्रकारांचो हालींच भोवमानय जालो. एकचित्तान वर्सांची वर्सां शिक्षण आनी पत्रकारीता करपी त्या शिक्षकांकय सलाम. ते अर्दवेळ खबरांकार, गरजेक उपेगाचे वेंचणुकेच्या वगतारय. बदल आपणावन नवे वाटेन ते वचपी, खिणांत बदलपी वाऱ्या पावसाचें गणीत शारांपरस गांवांक रोखडें होल्मता. गांवांतल्यो खबरो ते वाऱ्याचे गतीन धाडूंक शकतात, तांकां भास खबर आसता.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
