गुरु पुनवेच्या उत्सवा निमतान साईबाबा देवळांत कोटी रुपयांचें दान

भांगरभूंय | प्रतिनिधी

शिर्डी, खबरां संस्था ः गुरु पुनवेच्या उत्सवा वेळार भक्तांनी शिर्डीच्या साईबाबा देवळांत 6 कोटी 26 लाख रुपयांचें दान केले. ह्या तीन दिसांच्या उत्सवा वेळार भक्तांनी कोटी रुपयांचें दान केले. हुंडींत 2 कोटी 53 लाख, देणगी काउंटराक 1 कोटी 19 लाख, जाल्यार 8 लाख रुपयांचें भांगर आनी 2 लाख 7 हजार रुपयांचें रुपें दान केलां. ह्या उत्सवा वेळार दोन लाख भक्तांनी दर्शन घेतले. जाल्यार 205 भक्तांनी रगतदान केले. गुरुपुनवेच्या उत्सवाक दरवर्सा भक्त सरासरी पांच कोटी परस चड रुपयांचें दान करतात.
साईबाबा देवळांत गुरू पुनाव उमेदीन मनयली आनी ह्या वेळार लाखांनी भक्तांनी दर्शन घेतले अशें प्रशासनान सांगलां. ह्या तीन दिसांच्या उत्सवा वेळार 6 कोटी 25 लाख 98 हजार 344 इतली देणगी एकठांय जाल्या. हातूंत सशुल्‍क पास 46 लाख 73 हजार 400, डेबिट क्रेडीट कार्ड, ऑनलायन देणगी, चेक डीडी देणगी, मनीऑर्डर अशें मेळून वट्ट 1 कोटी 95 लाख 13 हजार 884 रुपया, भांगर 8 लाख 31 हजार 388 आनी रुपें 2 लाख 70 हजार 907 हांचो आस्पाव आसा.
ह्या उत्सवाच्या काळांत सुमार 1 लाख 91 हजार 349 साई भक्तांनी साई प्रसादालयांतल्यान प्रसाद भोजनाचो लाव घेतलो. जाल्यार दर्शन रांकेत 1 लाख 96 हजार 200 साई भक्तांक फुकट बुंदी प्रसाद पॅकेट वांटले. ह्या काळांत 62 लाख 31 हजार 125 रुपया सशुल्क लाडू पॅकेटांतल्यान प्रसाद म्हणून मेळ्ळे. ह्या महोत्सवाच्या वेळार संस्थान वाठारांत स्थापन केल्ल्या पयल्या उपचार केंद्रांत सुमार 5810 साई भक्तांनी उपचार घेतले आनी 205 साई भक्तांनी रगतदान केल्ल्याचें मुखेल कार्यकारी अधिकारी गोरक्ष गाडीलकार हांणी सांगलें.

समाजीक वावराक देणगींचो वापर

मजगतीं, भक्तां कडल्यान मेळिल्ल्या देणग्यांनी संस्था वेगवेगळीं भक्ती आनी समाजीक कार्यां करता. साई संस्थान सायनाथ हॉस्पिटलांत फुकट वैजकी उपचार आनी साई बाबा हॉस्पिटलांत मध्यम दरांत वैजकी उपचार दिता. व्हड दुयेंसां खातीर गरीब दुयेंतींक वैजकी अनुदान दितात. प्रसादालयांत फुकट अन्नदान करतात. दर वर्सा सुमार देड कोटी भक्तांक ताचो फायदो जाता. संस्थेच्या शिक्षणीक संकुलांत स हजार विद्यार्थी नाममात्र दरान गिन्यान मेळयतात. भक्तांक रावपाची वेवस्था मध्यम दरांत करुन दिल्या. राश्ट्रीय आनी सैमीक संकश्टांतय ही संस्था मजत करता.