भांगरभूंय | प्रतिनिधी
राधानगरी, खबरां संस्था: कोल्हापूर जिल्ह्यांतल्या कौलव गांवांत एक धपको बसपा सारकी गजाल उक्ताडार आयल्या. ह्या गांवांतल्या एका घरांत मनशाचो बळी दिवपाची तयारी सुरू आशिल्ली. हे खातीर चार ते पांच फूट फोंड खणून अघोरी विधी सुरू केल्लो. हे विशीं म्हायती मेळटांच गांवचे सरपंच रामचंद्र कुंभार आनी पंच वांगडी अनित पाटील हांणी पुलिसांक सांगून हें प्रकरण उक्ताडार हाडलें. काल रातीं राधानगरी पुलिसांनी अघोरी काम करप्यां सयत जमीन धनयाक अटक केल्या. गुप्त धनाच्या हावेसान हो सगळो प्रकार सुरू आशिल्ल्याचें लोक सांगतात.
शरद धर्मा माने आपल्या घरांत गुप्त धन मेळोवपा खातीर अघोरी पुजा करतालो. हे खातीर ताणें तांत्रिकांक आपयिल्ले. सरपंचांक हें कळटकच ते पंच आनी हेर ग्रामस्थांक वांगडा घेवन माने हांच्या घरा गेले. थंय तांकां देवांच्या मुर्तीं सामकार दवरिल्लें पुजेचें सामान आनी खणिल्लें चार-पांच फूट खोल फोंडकूल दिसलें, अशी म्हायती राधानगरी पुलिसांनी दिली.
ह्या वेळार तांत्रीक केळीच्या पानार शेंदरी दवरून हळद, कुकूम, सुपारी आनी लिंबाक खिळे तोंपून पुजा करतात अशें दिसलें. दुबावीत चंद्रकांत धुमाळ हो गळ्यांत रुद्राक्षांची जपमाळ आनी कवड्यांची माळ घालून कसले तरी मंत्र म्हणटालो. ताच्या शेजराक शरद माने बशिल्लो. हें सगळें पळोवन नरबळी दिवपाची तयारी सुरू आशिल्ल्याचो दुबाव सरपंच आनी पंचांच्या मनांत आयलो.
मजगतीं, राधानगरी पुलिसांनी ६ आरोपीं आड गुन्यांव दाखल केला. ह्या प्रकरणांत शरद धर्मा माने (५२ रा. कौलव ता. राधानगरी), महेश सदाशिव काशिद (तांत्रिक, ४५ रा. राजमाची ता. कराड), अशिष रमेश चव्हाण (३५ रा. मंगळवार पेठ, कराड जि. सातारा), चंद्रकांत हादेव धुमाळ (४० रा. मंगळवार पेठ कराड), संतोष निवृत्ती लोहार (४२ रा. वाझोली ता. पाटण जि-सातारा), कृष्णात बापु पाटील (५५ रा. पुलाची शिरोली ता. हातकणंगले) हांकां अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
