भांगरभूंय | प्रतिनिधी
चोरी, मारामारी, खंडणी, दुसऱ्यांक तोपी घालप… हे सारके गुन्यांव करप्यांचो आंकडो तसो उणो जावंक ना. फक्त खून कमी जाल्यात. गोंयांत 2022 वर्सा खून जाल्ले ताचे तुळेन पोरूं 40.91 टक्के उणाव जाला. 2019 ते 15 जून 2024 ह्या साडेपांच वर्सांच्या काळांत 178 खून जाल्यात. विधानसभेंत सरकारान ही म्हायती दिल्या. फक्त चार खून प्रकरणांनी आरोपींक ख्यास्त जाल्या, तर चार प्रकरणांनी दुबावीत निर्दोश सुटल्यात. 135 प्रकरणां वेगळ्यावेगळ्या न्यायालयांनी आसात, जाल्यार 16 चीं चवकशी जावपाची आसा. 1970 च्या दसकांत गोंयांत खून केल्ले खातीर कुमार नांवाच्या मनशाक गोळाक लायिल्लो. त्या काळांत गोंयांत खून म्हणल्यार दुर्मीळ अशी गजाल. संपर्क माध्यमां नाशिल्लीं, तरीय तोंडी वा रेडियो, पेपरांतल्यान लोकांक कळटालें. पुराय गोंय शोकाद जातालें. मात उपरांतच्या काळांत गुन्यांव वाडत गेले, 1990 च्या दसका उपरांत साद्या- साद्या कारणां वयल्यान झगडीं, मारामारी जावंक लागली. दुपट्टा किलर महानंदाक 2009 त अटक जाली. ताणें 16 चलयांक मारिल्ल्याची पुलिसांक कबुली दिली. तीन खुनांच्या प्रकरणांत ताका जल्मठेप जाल्या. गोंयांत खून, मारामारीचीं प्रकरणां जातात, तातूंत पयलीं परप्रांतियूच आसताले, मात आतां गोंयकारूय सांपडटात. पुलिसांनी चड कडक पावलां उबारले बगर हे गुन्यांव उणे जावचे नात. दुबावितां वयलो राजकी वरदहस्तूय उणो जावप चड गरजेचें.
फाटल्या साडेपांच वर्सांत गोंयांत गँगवाॅरूय जावंक ना, अशेंय लेखी जापेंत म्हणलां. ती जातालीं थारावीक वाठारांत. कांय फुडारी आपल्या सुवार्था खातीर तांकां जल दितात आनी मागीर ही विखा वेल पातळत वता. शिक्षण, रोजगार नाशिल्ल्यान तरणाटे वाट चुकपाचो धोको आसता…. आनी मागीर गँगवाॅराचीं रोंपां किल्लतात. कायदेय आनीक कडक जाल्यार बरे. पुलिसांचें तवनास, बेकार तरणाट्यांचेर बारीक लक्ष आसल्यार सहसा गँगवाॅर वा हेर कसलेय गुन्यांव जायनात. पुलीस 24 वरां गस्त घालतात. रातचो कोणूय भोंवतना दिसल्यार ताची चवकशी करतात. दुबावीत, ख्यास्त भोगून आयिल्लो आसल्यार ताचेर नदर दवरतात. लोकां कडल्यानूय गुपीतपणान म्हायती घेतात, ही बरी गजाल. समाज जागृत आसल्यार गुन्यांवांचो आंकडो उणो जावपाक मजत जातली, हें वेगळें सांगपाक नाका.
मटको हो आनीक एक गुन्यांव. तो उक्तेपणान चलता. एके स्लिपीचेर चलपी हो सगल्यांत विस्वासू असो जुगार, देखून तो कायदेशीर करपाक जाय, अशें कांय जाण म्हणटात. पूण ह्या मटक्याक लागून कोण लखपती, करोडपती जाल्ल्याचें उदाहरण ना. सोडून मटको घेवपी बुकी!! फाटल्या दोन वर्सांत 1805 जाणांचेर कारवाय जाल्या. सगले बुकी. मटको चलोवपी एजन्सीचेर कारवाय जावंक ना वा तो मटको राज्यांत चलचो न्हय, म्हूण यत्न जावंक ना. फक्त 27 प्रकरणांतल्या बुकींक न्यायालयान ख्यास्त दिल्या. म्हणजे सादारण देड टक्को जालो. मटक्या आड पुलीस अदींमदीं कारवाय करतात. तेन्ना बाजारांत आनी हेर कडेन दिसपी मेजां गायब जातात, पूण थोड्या दिसांनी तीं परत दिसतात. फाटल्या कांय वर्सां सावन थोडे मारुती व्हॅनींत बसून हो मटको धंदो चलयतात. मटक्या वांगडाच वॅबसायटीं वयल्यान जुगार चलता. तोय आळाबंदा हाडपाचो यत्न सायबर पुलिसांनी करपाक जाय. मसाज, एस्कोर्टाच्या नांवा खाला शिंदळकी धंदो चलता. हांचेरूय कारवाय जावंक फावो.
मोबायल फोन, ताचे वयलें इंटरनॅट आनी सोशल मिडिया हाकाय लागून गुन्यांव वाडल्यात. सध्या सगल्यांत नवो प्रकार चालू आसा, तो म्हणल्यार तुमच्या भुरग्यांचें अपहरण केलां, अशें फट सांगपी सायबर गुन्यांवकार. ते तुमच्या भुरग्यांचें नांव, शाळा, पिराय सगलें सांगतात. चड करून हिंदींत उलयतात. असले फोन येतकच रोखडेंच पुलिशेक कळोवंक जाय. मुख्यमंत्र्यान विधानसभेंत उलयतना हें आवाहन केलें. हातूंतले कांय गुन्यांवकार विदेशांतल्यान फोन करतात, अशें पुलिसांक दिसून आयलां. फोन येतकच वा पयशे धाडपा विशीं मॅसेज बी येत जाल्यार कोंकणींत संवाद सादपाक जाय. म्हणटकच हे हिंदी उलोवपी गुन्यांवकार गडबडटात. अर्थांत गोंयांत रावपी आसल्यार ते कोंकणी शिकिल्लेय आसूं येतात. तरीय कोंकणींत उलयतकच फोन डिस्कनेक्ट करतात, हो जायत्या जाणांचो अणभव. तरीय सायबर गुन्यांवांक फटवपाच्यो खूब घडणुको गोंयांत घडल्यात. पयशे दुपेटीन करून दिवपाच्या फोनांक तर बरेच गोंयकार बळी पडल्यात. निदान आतां तरी सादूर जावया. गोंय हें पर्यटन राज्य. म्हणटकच उंवाळून उडयिल्ले कांय लोकूय हांगा येतलेच. ताका लागून सरकारी यंत्रणा आनी सामान्य मनश्यांचेरूय व्हडली जापसालदारकी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
