भांगरभूंय | प्रतिनिधी
घुंवळे वखदांचेर कांय वर्सां पयलीं ‘उडता पंजाब’ नांवाचो सिनेमा आयिल्लो. त्याच वेळार पुलिसांनी गोंयांत ड्रग्स धरिल्ले आनी कोणेतरी ‘उडता गोवा’ अशी टिप्पणी केल्ली. तेन्ना नीज गोंयकारांक तिडक आयिल्ली. आयज पसून दर दिसा कोणाक ना कोणाक ड्रग्सां सयत अटक जाता, तेन्नाय खऱ्या गोंयकारांचे काळीज रडटा. ते तिडकतात, आडवे तिडवे उलयतात, मात हाचे भायर कांय करपाक शकनात. ड्रग्सांचेर नियंत्रण दवरपाक यंत्रणा आसा, तीच असहाय्य जाल्ले सारकी दिसता, मागीर सामान्य लोकांचें कितें? मुळांत ड्रग्साचो राकेस जिवो मारपाक इत्साशक्त जाय. पूण, सांपडटात, ते पोंतयेंत ड्रग्स घेवन विकपाक भोंवपी किरकोळ विक्रेते. तांणी तें कोणा कडल्यान हाडिल्लें, तें कोणाक दिवपाक आयिल्ले, तें मात जाहीर जाताच असें ना. खरेंच तें कळना, काय ‘तेरी भी चूप और मेरी भी चूप’, असलो हो प्रकार? ‘पुलिसांक मेळिल्ले म्हायती वयल्यान…’, अशें एक वाक्य सगल्या खबरांनी आसता. ही खबर दिवपी खबऱ्यांक ड्रग्साचे सुत्रधार कोण तें खबर आसता काय? तांकां कशें कळटा, अमूक मनीस तमूक जाग्यार ड्रग्स घेवन वचपाचो आसा म्हूण? गोंयांत जप्त जातात, तीं उणें रकमेचीं घुंवळे वखदां. मात, आतां आमचें गोंय मुखेल प्रवाहांत आयलां, अशें म्हणपाक हरकत ना. सोमारा रातीं चिकोळण्यां 43 कोटी 20 लाख रुपयाचें कोकेन गुन्यांव फांट्यान जप्त केलां. कोलकाताच्या एकल्याक अटक केल्या. ताणें वांगडी जोडप्याचें नांव सांगलां. ताकाय धरला. आतां मेरेन गोंयांत जप्त केल्लो हो सगल्यांत व्हडलो ड्रग्स सांठो.
एका सरकारी अदमासा प्रमाण, वर्साक 300 अब्ज रुपयां वयर ड्रग्स भारतीय अर्थवेवस्थेंत घोळटा खंय. म्हणल्यार ह्या बेकायदेशीर धंद्यांत कितले लोक आसतले, ताची फक्त कल्पना करची. काम, धंदो करिनासतना फोल्गां मारपी एक समाज (म्हणल्यार चोंबो. जात, धर्म ह्या अर्थान न्हय.) गोंयांत जळीमळीं दिसता. दर्या वेळो आशिल्ल्या गांवांतल्या गांवकारांक ह्या ड्रग्साच्या धंद्यांत कोण, कशे घुस्पल्यात, ते हो धंदो कसो करतात, कोणाचो तांकां आशिर्वाद आसा…. ताची बारीकसारीक म्हायती आसतली. पूण पुरावे नाशिल्ल्यान आनी जीव वचूं येता, ह्या भंयान कोण शेणांत फातर मारपाक वचनात. पुलिसांकूय तांचे परस चड म्हायती आसतलीच. पूण, तांचे कडल्यानूय मुळार घांव बसना. फक्त झाडांच्यो ल्हान खांदयो बेणप जाता. तांचे हात बी बांदिल्ले आसतात काय? बुराटे, करबट जाळांत सांपडटात. मात विस्वण, चणाक पयस – पयस मेरेन झळकना. कांय वर्सां पयलीं एक नांव मुखार आयिल्लें, बोवाळ जाल्लो. पूण, उपरांत तो मनीस तो न्हय, तर भलतोच कोण तरी, अशें उक्तडार आयिल्लें. कांय जापसालदार राजकी मनशांनीय तशें जाहीर केल्लें. परिणाम, आयज पसून सप्तकाक 2- 3 मनीस ड्रग्सां सयत सांपडटात. पूण, सुत्रधार अदृश्यच उरल्यात!
पोरूं नोव्हेंबर- डिसेंबरांत दिल्लींत 2400 कोटींचें कोकेन धरिल्लें. ताचे पयलीं 9000 कोटींचें. पोरुंचे हे सगल्यांत व्हडले सांठे. त्याच सुमाराक गुजरातांतूय कोट्यांनी रुपयांचें ड्रग्स बोटींतल्यान आयिल्लें. चडशीं घुंवळें वखदां फक्त पाकिस्तानांतल्यान येतात, असो एक समज आमी करून घेतला. कोलंबिया, युरोपांतल्यानूय तीं येतात. विमानतळ, धके, रस्तो, रेल्वे मार्गां वयलीं सुरक्षा कडक केली जाल्यार घडये ड्रग्स धंद्याचेर नियंत्रण येवं येता. सगल्यांत पयलीं दोशी व्यक्तीक उणींच 10 वर्सांची बंदखण जावंक जाय. एक किलां परस उणें ड्रग्स मेळत जाल्यार स म्हयने बंदखण, 10 हजार रुपया दंड वा दोनूय, अशी ख्यास्त आसा. चड आसल्यार 10 वर्सां बंदखण आनी एक लाख रुपया दंड दितात. पूण, खरेंच तितली ख्यास्त मेळटा?! चीन, मलेशिया, इराण, व्हिएतनामांत ड्रग्स विकतना सांपडल्यार मरणख्यास्त मेळपाची चड शक्यताय आसता. मलेशियांत सोरो पियेवन गाडी चलयल्यारूय जल्माची बुद्द शिकयतात. आखाती देशांनीय ड्रग्सां बाबतीतले कायदे कडक. सिंगापूरांत ड्रग्स विकता म्हूण सिद्ध जायत जाल्यार गोळार वचपाचें! चुकीक माफी ना. भारतांतले कायदे कडक केले बगर ड्रग्स विक्रेचेर नियंत्रण येवप शक्य ना. किरकोळ विक्रेत्यांक धरचेच, पूण गोंयचे, भारतांतले पाब्लो एक्सोबार खंयच्या भुंयारांत लिपून बसल्यात, तें पयलीं सोदून काडचें. खूब कठीण आनी लागीं – लागीं अशक्य अशें हें काम. पूण तें हातांत घेना जाल्यार पिळगे फाटल्यान पिळगी ड्रग्साचे भकीक पडून भलायकी इबाडून घेतली. ‘इजी मनी’च्या फाटल्यान लागिल्ल्या देशद्रोह्यांक लागून समाजाचें गुन्यांवकारीकरण जातलें, हिंसाचार वाडटलो. पयलेच फावटी इतलो व्हडलो ड्रग्स सांठो धरिल्ले खातीर गुन्यांव फांट्याक परबीं. अशेंच काम करून ‘सत्यमेव जयते’ ह्या भारतीय पुलिसांच्या घोशवाक्याक जागचें!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
