भांगरभूंय | प्रतिनिधी
पणजी : गोंय पुलिसांच्या गुन्यांव फांट्याच्या पंगडान काल रातीं नागव्यां-बार्देसांत धाड घालून घानाचो नागरीक सेबॅस्टियन डुआह (३५) हाका अटक केली. ताचे कडल्यान पुलिसांनी १५ लाख रुपयांचो एमडीएमए ६० गुळयो (ड्रग्स) आनी ’यामाहा फॅसिनो’ दुचाकीय जप्त केली.
नेमकें प्रकरण कितें?
गुन्यांव फांट्याक मेळिल्ले गुपीत म्हायतीच्या आदारार ११ एप्रील २०२५ तारखेर रातच्या ८.५८ ते ११.२५ मजगतीं बार्देस म्हालांतल्या नागवेंच्या राउतावाड्यार मसंडभूंय वाठारांत ही कारवाय केली. गुन्यांव फांट्याचे निरीक्षक विकास देसकर, सहाय्यक उपनिरीक्षक श्रीराम साळगांवकार, हेड कॉन्स्टेबल मंगेश देशपांडे, पुलीस कॉन्स्टेबल सुशांत पागी, रूपेश गायकवाड आनी प्रकाश उत्कुरी हांच्या पंगडान ही कारवाय केली.
अटक केल्ल्या आरोपीचें नांव सेबॅस्टियन डुआह (३५, मूळ घाना, सध्या नागव्यां) अशें आसा. ताचे कडल्यान पिंक, ब्राऊन आनी ऑरेंज रंगाच्यो त्रिकोणी आनी आयताकृती ६० गुळयो जप्त केल्यो. ह्यो गुळयो एमडीएमएच्यो आशिल्ल्याचो मुळावो अदमास. ह्या गुळयांचें वजन २६.३०४ ग्रॅम आसा. अंतरराष्ट्रीय बाजारांत ताचें मोल सुमार १५ लाख रुपया आसा. ताचे ’यामाहा फॅसिनो’ हे निळ्या रंगाचे दुचाकीचे डिक्कींत तांणी त्यो गुळयो लिपोवन दवरिल्ल्यो. पुलिसांनी ड्रग्सा सयत दुचाकीय जप्त केली.
ह्या प्रकरणांत एनडीपीएस कायद्याच्या कलम २२ (क) खाला गुन्यांव दाखल केला. फुडलो तपास पुलीस अधीक्षक राहुल गुप्ता आनी उपअधीक्षक राजेश कुमार हांच्या मार्गदर्शना खाला आनी पुलीस निरीक्षक विकास देसकार हांच्या देखरेखी खाला सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
