भांगरभूंय | प्रतिनिधी
स्पॉट द स्कॅम आनी रेडीकल कंटेन्ट एनालायजरचें जालें उक्तावण
पणजी : गुन्यांवांच्या तपासांत ह्यान फुडें गोंय पुलिसां वतीन चडांत चड प्रमाणांत तंत्रज्ञानाचा वापर जातलो. तंत्रज्ञानाच्या वापरांत हेर राज्यांचे तुळेंत गोंय कायमचें मुखार उरतलें अशें प्रतिपादन मुख्यमंत्री डॉ. प्रमोद सावंत हांणी केलें. पुलीस मुख्यालयांत मुख्यमंत्र्यां हस्तुकीं स्पॉट द स्कॅम आनी रेडीकल कंटेन्ट एनालयजराचें उक्तावण केलें. हीं दोनूय उपकरणां बिटस पिलानीच्या विद्यार्थ्यांनी तयार केल्यांत.
पश्चीम विभागीय राज्यांचे बसकेंत केंद्रीय गृहमंत्री अमित शहा हांणी रेडीकल कंटेन्ट एनालायजरची तोखणाय केल्ली. हेर राज्यांय ह्या उपकरणांचो वापर करतले. आयज सगल्याच मळांचेर तंत्रज्ञानाचो वापर जाता. गुन्यांवकार लेगीत तंत्रज्ञानाचे मजतीन गुन्यांव करतात. गुन्यांवांचेर नियंत्रण दवरपा वांगडा गुन्यांवकारांक धरपाक आतां तंत्रज्ञानाच्या वापरा बगर हेर पर्याय ना. क्वीक पास्ट ऍप, ट्रॅक सेंटर, क्लावड बेस्ड सायबर कॉल सेंटर या तंत्रज्ञानाचो वापर पुलिसांनी सुरू केला. स्पॉट द स्कॅम आनी रेडीकल कंटेन्ट एनालायजराक लागून सायबर गुन्यांवांच्या तपासांत पुलिसांक मजत जातली. हीं दोनूय उपकरणां तयार करपा खातीर बिट्स पिलानीचे विद्यार्थी तोखणायेक आनी परबीं खातीर पात्र आसात. ह्यान फुडेंय बिटस पिलानीची तंत्रज्ञाना खातीर सरकार मजत घेतलें, अशें डॉ. प्रमोद सावंत हांणी म्हणलें.
पुलीस महासंचालक आलोक कुमार, पुलीस अधीक्षक राहूल गुप्ता आनी हेर पुलीस अधिकारी कार्यावळीक हजर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
