भांगरभूंय | प्रतिनिधी
जमीन हडप प्रकरणांत एसआयटीचो अहवाल बेगिनूच
पणजी : जागृताय तशेंच पुलिसांच्या यत्नाक लागून गुन्यांवांचें प्रमाण 28.83 टक्यानी उणें जालां. गुन्यांवांच्या तपासाचें प्रमाण 85 टक्के असून ते देशांत सगल्यांत चड आसा, अशें मुख्यमंत्री डॉ. प्रमोद सावंत हांणी सांगलें.
सभाघरांत सोमारा गृह, उजो पालोवपी दळ, सर्वसामान्य प्रशासन ह्या खात्यांच्या मागण्यांचेर चर्चा जाली. चर्चेक जाप दितना मुख्यमंत्री डॉ. प्रमोद सावंत हांणी ही म्हायती दिली. चर्चे उपरांत मागण्यो सभाघरान मान्य केल्यो.
पर्यटना खातीर स्वतंत्र पुलीस फांटो स्थापन जातलो. पुलीस खात्यान हालींच 150 पुलीस उपनिरिक्षक आनी 450 पुलीस शिपायांची भरती केल्या. 130 होम गार्डसांक पुलीस खात्यांत घेतले. हाका लागून पुलिसांचो उणाव जावचो ना. बायलां आड जावपी गुन्यांवांचें प्रमाण उणें जालां. एसआयटी स्थापन जावन चवकशी सुरू जाल्ल्यान बेकायदाे जमीन हडप करपाचे प्रकार बंद जाल्यात. जमीन हडप प्रकरणाचो एसआयटीचो अहवाल जाहीर जातलो. मुंबयच्या गोवा सदनाचें काम पुराय जावन कंत्राटदार नेमपाची प्रक्रिया सुरू जाल्या. फुडल्या 3 म्हयन्यांत गोवा सदन सुरू जातलें. दिल्लीचे गोवा निवास इमारतीचें नुतनीकरण जातलें. ही पोरणी इमारत आशिल्ल्यान इमारतीचें नुतनीकरण करपाची गरज आसा. पणजे पाट्यार प्रशासकी इमारत बांंदपाची प्रक्रिया सुरू जाल्या.
142 जाणांचे जीव वाटावपाक येस
उजो पालोवपी दळान अंदूं 142 जाणांचे जीव वाटायल्यांत. 774 जनावरां सयत 169 कोटींची मालमत्ता वाटायल्या. काणकोणां आनी धारबांदोड्यां नवी उजो पालोवपी दळाची स्टेशनां जातलीं.
बेकायदाे कॅसिनो बंद जावपा सयत 10 हजार कोटींच्या कॅसिनो भानगडीची गृह आनी जीएसटी खातेें खातरजमा करतले. दक्षता खात्या कडेन 2,700 कागाळी आयल्यो. हातूंतल्यो 1,900 कागाळी निकालांत काडल्यात. दक्षता खात्याचे अधिकारी तशेंच कर्मचार्यांक प्रशिक्षण दिता.
15 ऑगस्ट मेरेन सुटके झुजार्यांच्या 60 भुरग्यांक नोकर्यो
15 ऑगस्ट मेरेन सुटके झुजार्यांच्या 60 भुरग्यांक नोकर्यो मेळटल्यो. 400 मदीं 133 भुरग्यांक अजून नोकर्यो मेळपाच्यो आसात. ऑक्टोबर मेरेन सगल्या 133 भुरग्यांक नोकर्यो मेळटल्यो. 15 ऑगस्ट मेरेन 60 जाणाक नोकर्यो मेळटल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
