भांगरभूंय | प्रतिनिधी
बनावट नोटीं तस्करी प्रकरणाचेर सुनावणी करतना टिप्पणी
नवी दिल्ली, खबरां संस्था ः गुन्यांवकार जल्माक येनात, ते तयार जातात अशें एका प्रकरणाचे सुनावणे वेळार सर्वोच्च न्यायालयान सांगलें. न्यायालयान हें निरिक्षण 3 जुलयाक केल्लें. ह्या प्रकरणाची सुनावणी न्यायाधीश जेबी परडीवाला आनी न्यायाधीश उज्ज्वल भुईया हांणी केली.
2020 वर्साचें हे प्रकरण बनावट नोटी तस्करी कडेन संबंदीत आसा. फेब्रुवारी 2020 वर्सा एनआयएन मुंबयच्या अंधेरी वाठारांतल्या एका तरणाट्याक 2 हजार रुपयांच्या (भारतीय चलन) 1193 बनावट नोटी सयत ताब्यांत घेतिल्लो. ह्या बनावट नोटींची पाकिस्तानांतल्यान मुंबयत तस्करी जाल्ल्याचो दावो एजन्सीन केला.
हो तरणाटो फाटलीं 4 वर्सां एनआयएच्या ताब्यांत आसा. 5 फेब्रुवारी 2024 दिसा तांणी मुंबय उच्च न्यायालयांत जामीन अर्ज दाखल केल्लो, पूण न्यायालयान तो न्हयकारलो. हाचे उपरांत तरणाट्यांन उच्च न्यायालयाच्या आदेशाक सर्वोच्च न्यायालयांत आव्हान दिलें.
जायतीं कारणां आसतात- खंडपिठ
दरेका मदीं बरी मनीसपणाची तांक, मानवी क्षमताय आसता. देखून आतां गुन्यांवकार आशिल्ले फुडाराक सुदारूंक शकनात अशें मानूंक फावना. गुन्यांवकार, किशोर आनी प्रौढ हांचे कडेन वेव्हार करतना मुळावीं मानवतावादी तत्वां चड करून चुकतात.
गुन्यांव जाता तेन्ना ताचे फाटल्यान जायतीं कारणां आसतात अशें खंडपिठान सांगलें. समाजीक वा अर्थीक आसूं, पालकांनी केल्ले आडनदरेचो परिणाम, प्रिय व्यक्तीं कडल्यान अपेक्षा, प्रतिकूल परिस्थिती, गरिबी, समृद्धीचो उणाव वा हाव हांचो परिणाम आसूं येता.
फाटलीं 4 वर्सां सावन याचिकादार कोठडेंत आसा. गुन्यांवाच्या स्वरूपाची पर्वा करिनासतना संविधानाचें कलम 21 लागू जाता अशें हुस्को उक्तायतना खंडपिठान सांगलें.
गुन्यांव कितल्योय गंभीर आसूं, भारताच्या संविधाना खाला आरोपीक बेगीन खटलो चलोवपाचो अधिकार आसा अशें खंडपिठान सांगलां. काळाप्रमाण ख्यास्त म्हणून जामीन आडावंक फावना हें कायद्याचें थारायिल्लें तत्व ट्रायल कोर्ट आनी हायकोर्ट विसरल्यात.
आरोपीक मंजूर केलो जामीन
बेगोबेग खटलो चलोवप हो गुन्यांवकाराचो मुळावो हक्क अशें खंडपिठान आपल्या निर्णयांत म्हणलां. गुन्यांव गंभीर आसा अशें म्हणत ताच्या जामीन अर्जाक एजन्सी विरोध करूंक शकना. ह्या प्रकरणांत ताचें उल्लंघन जालां, ताका लागून संविधानाच्या कलम 21 चें उल्लंघन जालां. मुंबय शार सोडप ना आनी दर 15 दिसांनी एनआयए कार्यालयांत वा पुलीस स्टेशनांत येवन हजेरी लावपाच्या अटीचेर न्यायालयान आरोपीक जामीन मंजूर केलो. ह्या प्रकरणांत आरोपींचे दोन सहकारी जामीनाचेर पयलींच भायर आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
