भांगरभूंय | प्रतिनिधी
नवी दिल्ली, खबरं संस्था : राजकारणांत गुन्यांवकारांचें वर्चस्व भौसाक नवें न्हय. मात अशा गुन्यांवकारांक सत्ते भायर दवरपा खातीर भारतीय वेंचणूक आयोगान खर भुमिका घेतल्या. अशा उमेदवाराक राजकी पक्षान तिकेट दिल्यार तांकां लोकांक जाप दिवची पडटली. असो नेम आयोगान चालीक लायला.
नवी दिल्ली सावन लोकसभा वेंचणुकेचें वेळापत्रक जाहीर करतना मुखेल वेंचणूक आयुक्त राजीव कुमार हांणी वयलो विशय स्पश्ट केलो. जनतेक आपलो प्रतिनिधी नेमपाक सोंपे जावचे खातीर उमेदवारांची सगळी फाटभूंय समजपाक जाय. हाचे खातीर वेंचणूक आयोग KYC ऍप्लिकेशन लॉंच करतले. हातूंत छाननी उपरांत जे उमेदवार वेंचणुकेंत उरतले तांची मतदारसंघनिय म्हायती प्रसारीत करतले. हातूंत उमेदवारांची फाटभूंय, तांची संपत आनी हेर म्हायती जनते खातीर उपलब्ध आसतली, अशें राजीव कुमार हांणी सांगलें.
उमेदवारांची गुन्यांवकारी फाटभूंय आसल्यार उमेदवारान दिसाळ्यांनी आनी खबरां चॅनलांनी तीन फावटीं आपलें निवेदन दिवप सक्तीचें. आदीं खंयचे गुन्यांव नोंद जाल्ले? सध्या कितें कागाळी वा खटले आसात? तांकां सविस्तर म्हायती जाहीर करची पडटली. हाचे भायर असो उमेदवार उबो केल्ल्या राजकी पक्षाकूय लोकांक जाप दिवची पडटली. तांणी हो उमेदवार कित्याक वेंचलो? खंयचे निकश आसात? दुसरो उमेदवार मेळूंक शकलो ना? ह्या प्रस्नांच्यो जापो तांकां दिवच्यो पडटल्यो अशें राजीव कुमार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
