भांगरभूंय | प्रतिनिधी
रवी नायक हांणी एक डॅशिंग मुख्यमंत्री आनी गृहमंत्री ह्या नात्यान गोंयांत वाडपी गुन्यांवकारी आनी दुश्ट प्रवृत्तीचेर चाबूक मारलो.
खरें सांगपाचें म्हणल्यार हो लेख बरयतना सर्गेस्त रवी नायक सर हांचे विशीं खंयच्या मुद्द्याचेर बरोवचे, हो प्रस्न निर्माण जाल्लो. रवी सीताराम नायक हांचें लोकप्रतिनिधी ह्या नात्यान केल्लें राजकारण, प्रशासन, गृहमंत्री, मुख्यमंत्री, शिक्षण क्षेत्राचो विकास, कलामोगी आमदार आनी मंत्री, पत्रकारांचे आनी सर्वसामान्य लोकांचे भाषणां आनी संवादाच्या माध्यमांतल्यान दिलखुलासपणान विनोदी पद्धतीन भाषणां दिवन आनी जापो दिवन केल्ले मनोरंजन वा तांणी राजकारणी म्हूण खेळिल्ल्यो चाली… कित्याचेर बरोवपाचे? रवी नायक हांचेर कांयच न्हय म्हटल्यार चार- पाच लेख सहज तयार जातले. मागीर म्हणलें, भावना वा विचार जशे येता तशे त्या प्रवाहा सयत व्हांवून वचप.
रवी हांचो एक सर्वसामान्य व्हॉलीबॉल खेळगडो, मोटारसायकल पायलट, नगरसेवक, आमदार, मंत्री, मुख्यमंत्री, समाजसेवक, राजकारणी, किंगमेकर, गुन्यांवकारांचो कर्दनकाळ, कर्तव्यदक्ष गृहमंत्री, सर्वसामान्य लोकांक मजत करपी, तांचो संवसार उबो करपाक आदार करपी एक लोकनायक. हो समाजिक, राजकी, प्रशासकी प्रवास थक्क करपी आसा, जो गेल्या सप्तकांत शांत जालो. 1990 चे दशकांत म्हजे पिळगेतले भुरगे आपल्या पांयांचेर चलपाचे सोडात, उबे लेगीत रावूंक नाशिल्ले, तेन्ना रवी नायक हांणी एक डॅशिंग मुख्यमंत्री आनी गृहमंत्री ह्या नात्यान गोंयांत वाडपी गुन्यांवकारी आनी दुश्ट प्रवृत्तीचेर चाबूक मारलो. गोयचे तेन्नाचे गुंड, माफिया हांकां सोंपोवन रवी तांचे कर्दनकाळ जाले. ह्यो गजाली तो काळ पळयिल्ले लोक आयजय उलयतात, वाचतात, बरयतात आनी ताचेर चर्चा बी करतात. पुलिसांक मुख्यमंत्री म्हुण तांणी “फ्री हॅण्ड” दिले उपरांत पुलिसांनी गुंडांचो नायनाट कसो केलो, हाच्यो सुरस कथा आयकत आमची पिळगी हायस्कूल, कॉलेज आनी विद्यापीठ स्तरावेले शिक्षण ह्या तीन स्थित्यंतरातल्यान गेली.
ल्हान आसतना गाडयेंतल्यान फर्मागुडी वाठारांत प्रवास करचो पडलो जाल्यार पीइएस म्हाविद्यालयाचे इमारतीचेर “रवी सीताराम नायक कॉलेज ऑफ आर्टस अॅण्ड सायन्स ” ही अक्षरां यत्ता सातवी वा यत्ता आठवेंक आसतना वाचुंक कळटाली आनी “हो आनी कोण भाटकार?” असो प्रस्न मनात येतालो. बरे व्हड प्रस्थ शें दिसता, असो विचार करतनाच तेच हायर सेकंडरी आनी कॉलेजात शिकपाची संद मेळटगीच हो भाटकार वा प्रस्थ म्हणल्यार कितले व्हडले व्यक्तिमत्व हाचो साक्षात्कार जालो. रवीबाब हांची एक खासियत म्हणल्यार आपल्या भाशणांनी लोकांक हांसोवन तांची मनरिजवण करप, जे खूब कमी राजकारणी व्यक्तींक जमता. कॉलेजींत एका कार्यक्रमाक रवी नायक हांचें भाशण चलतालें आनी तांणी नेमको एका गंभीर विशयाक हात घाल्लो. माचयेर येवचे पयलीं थंयच्या झाडा वेल्यान पडिल्लो पणस रवीबाबान आपल्या एका मनशा वरवीं काडून गाडयेंत दवरपाक सांगिल्लें. तो देडशाणो पणस घेतलो आनी रवी उलयताले तेन्ना सगल्यां मुखार माचये कडल्यान तांच्या तोंडा कडेन पळयत हांसत वचपाक लागलो. रवीबाब हांणी गंभीर विशयाचेर उलयतना मदीच पाॅज घेवन ताका पळोवन म्हणलें “हो फणस मात्सो गाडयेंत दवर आं” त्या बरोबर विद्यार्थी वर्ग, शिक्षक आनी कर्मचारी वर्ग हांचे मदीं जो हास्याचो स्फोट जालो, तो ना आमचे तुकडेतले विद्यार्थी केन्ना विसरले नात, आमचे वरिश्ठ सहकारी फुडें काय वर्सां तो प्रसंग रंगोवन, मीठ- मिरसांग लावन सांगताना थकले.
तांचे कडेन प्रत्यक्ष उलोवपाचो प्रसंग म्हज्या आयुश्यांत दोनदां आयलो, एकदा पत्रकार म्हूण म्हज्याच म्हाविद्यालयात एका कार्यक्रमाची बातमी करपाक गेल्लों, तेन्ना ते चॅरमन ह्या थाटात जे अदबींत उलयले तें सामकें याद उरलें आनी 4- 5 वर्सां पयलीं जाल्ले एके जाहीर सभेंत लोकां गराड्यांत एक लोकफुडारी म्हूण ते मेळ्ळे, तेन्ना. लोकां मदी तांचें आकर्षण आनी व्यक्तिगत वलय (Charisma) पळोवन एका वेळचे आदले फिल्मस्टार अमिताभ बच्चन, राजेश खन्ना आनी फिरोज खान हांका मेळटा काय कितें, अशी भावना निर्माण जाताली. तांचे भाषण आयकुपाक लोक मुद्दाम रावताले, ते तांचे भितर आशिल्ली विनोदबुद्धी आनी तांचें व्यक्तिमत्वाचें आकर्षण (Aura) आशिल्ले म्हूण. रवीबाब आयज सोडून गेल्या उपरांत तांचे बरोबर काम केल्ले मंत्री, आमदार, प्रशासकी अधिकारीच न्हय, तर पत्रकार, कलाकार, फोंडे धरून सगले वाठारांतले तरणाटे, सर्वसामान्य तळागाळातले लोक भावूक जाल्ले आसात. सोशल मीडिया, युट्यूब, फेसबुक हांचेर “लोकनायक”, “नॉट जस्ट समोसा खाया, चाय पिया”, “पात्रांव, फटयले मरे ” अशे तरेच्यो स्टोरीज अजून चालू आसात. चड भावनिक जावन विचार व्यक्त करत वचून ‘भांगरभूंय’चे एक पुराय पान म्हज्याच लेखान भरचे पयली हांगाच थारता. तीन वर्सां आदीं लोकसभा वेंचणुके वेळार फोंडेच्या फर्मागुडी वाठारांत जाल्ले जाहीर सभेत तांणी “अग्निपथ” फिल्मात अमिताभ बच्चन हांणी “पुरा नाम विजय दीनानाथ चौहान, बाप का नाम दीनानाथ चौहान, मा का नाम सुहासिनी चौहान..” ह्या शैलीत केल्ल्या भाषणाक लोक आनी खास करून फोंडेकार केन्नाच विसरचेनात. उनके बाप का नाम, सीताराम. उनका नाम, रवी – सूर्य…..
– सनतकुमार फडते
70204 38469
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
