भांगरभूंय | प्रतिनिधी
गोंय मुंबय उच्च न्यायालयाचो म्हत्वाचो निर्णय
पणजी ः मनशाचेर गुन्यांवकारी खटले प्रलंबीत आसले तरी ताच्या पासपोर्टाचें नुतनीकरण 10 वर्सां खातीर न्हयकारप वा फकत एका वर्सा खातीर ताचें नुतनीकरण करप योग्य न्हय अशें गोंयच्या मुंबय उच्च न्यायालयान म्हणलें. देखून प्रलंबीत खटले आशिल्ल्या व्यक्तीचो पासपोर्ट पुराय 10 वर्सां खातीर नुतनीकरण करपाचो आदेश न्यायालयान प्रादेशिक पासपोर्ट कार्यालयाक दिलो.
ह्या प्रकरणांत संबंदीत व्यक्तीचेर दोन खटले न्यायालयांत प्रलंबीत आसात. पूण हे प्रकरण फकत पासपोर्ट नूतनीकरणाचे आशिल्ल्यान, हे खातीर खटले चालू आशिल्ल्या न्यायालया कडल्यान खंयच्याय विशिश्ट आदेशाची गरज ना असो निकाल मे म्हयन्यांत उच्च न्यायालयान दिल्लो.
पूण पासपोर्ट खात्यान फकत एका वर्सा खातीर ताच्या पासपोर्टाचें नुतनीकरण केलें. हाका लागून संबंदीत व्यक्ती परतून उच्च न्यायालयांत गेलो. ताचे वतीन वकिल गौतमी कामत हांणी, पासपोर्टाचें नुतनीकरण 10 वर्सां खातीर करचें असो युक्तिवाद केलो. मजगतीं, केंद्र सरकारा वतीन अभियोक्ता रविराज चोडणकार हांणी विरोध केलो आनी अशा प्रकरणांत पासपोर्ट फकत एका वर्सा खातीर दिवचो, आनी मागीर संबंदीत न्यायालयांतल्यान एनओसी घेवन फुडलें नूतनीकरण करचें अशें सांगलें.
पूण न्यायाधीश भारती डांगरे आनी निवेदिता मेहता हांच्या खंडपिठान केंद्र सरकाराचो युक्तिवाद न्हयकारलो. पासपोर्ट आसप म्हळ्यार आपोआप परदेशांत भोंवपाची परवानगी मेळप असो अर्थ जायना. संबंदीत मनशाक परदेशांत वचपाचे आसल्यार ताणें आपलो खटलो ज्या न्यायालयांत चालू आसा थंयच्यान परवानगी घेवची अशी अट आमी घालतात. देखून 10 वर्सां पासपोर्ट न्हयकारपाचो भंय अमर्यादीत आसा अशें तांणी स्पश्टपणान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
