भांगरभूंय | प्रतिनिधी
तेन्ना कितल्याशाच लोकांनी भाडेकरूं विशीं पुलिसांक कळोवंकूच नाशिल्ल्याचें उक्तडार आयिल्लें. पुलिसांनी तांकां अटक करून मागीर सोडले. खरें म्हणल्यार….
कोंकण रेल्वे सुरू जावपाची आशिल्ली तेन्ना तिच्या विरोधांत व्हडलें आंदोलन सुरू जाल्लें. मार्ग बदलचो, अशी मागणी करीत तें बरोच काळ चल्लें. अखेरेक मार्ग बदल्लो. त्या वेळार कांय लोक युक्तीवाद करताले, रेल्वेंतल्यान गुन्यांवकार येतले आनी गुन्यांव करून सोंपेपणी रेल्वेंतल्यान पळून वतले. अर्थांत खंयचेय गजालीचे फायदे तशेंच लुकसाणूय आसता. कोंकण रेल्वेचें राज्याचे उदरगतींत व्हडलें योगदान आसा. गोंयकारांक येरादारीचेंय सवाय आनी वेगान वचपी साधन मेळ्ळां. कांय प्रमाणांत तो गुन्यांवकार येतले हो युक्तीवादूय खरो आसा. तो सामकोच भायर उडोवपाक मेळना. कोंकण रेल्वे पुलिसांनीय कितलेशेच फावटी तांकां धरल्यात. पूण, ते रेल्वेनूच कित्याक? बशी, खाजगी मोटारी, ट्रक, विमानांतल्यान पसून येतात. गुन्यांव करपाक येतात वा दुसऱ्या राज्यांत गुन्यांव करून गोंयांत येवन रावतात. कांय आतंकवाद्यांक पसून हाचे पयलीं धरल्यात. तांकां तोंडा वयल्यान कोण वळखनात. म्हणटकच ते रुप बदलून भाड्यान घर, फ्लॅट घेवन रावतात वा हाॅटेलांत कांय दीस रावन मागीर दुसरे कडेन वतात. आतां असल्या गुन्यांवकारांची वळख पटची आनी तांकां धरपाक मेळचे, हे खातीर सरकारान खाशेली येवजण आंखल्या.
राज्यांतल्या सगल्या प्रवेशदारांचेर सप्टेंबर उपरांत सीसीटीव्ही सर्व्हीलन्स वेवस्था सुरू करतले. सध्या दर्यादेग वाठारांत ती चालू आसा. लाखांनी पर्यटक गोंयांत येतात. ताचेच वांगडां दुसऱ्या राज्यांनी खून, बलात्कार, दरोडो घालून लिपून रावपाक कांय गुन्यांवकार गोंयांत येतात. ते खंयच्याय मार्गान राज्यांत येतकच प्रवेश करपाचे वाटेरूच तांचें मुखामळ सीसीटीव्ही सर्व्हीलन्सा वरवीं कैद करतले. म्हणटकच तांची वळख पटून तत्काळ कारवाय करप पुलिसांक शक्य जातलें. पूण, ते खातीर हेर राज्यांच्या तपास यंत्रणां कडली म्हायती अपडेट आसची पडटली. हरशी पुलीस स्टेशनांचेर खंयचोय गुन्यांवकार पळून गेलो काय ताचो फोटो पुलीस देशभरांत धाडटात. ताचे वयल्यान त्या- त्या राज्यांतले पुलीस सोदूय घेतात. हालींच द. गोंयांत दोग चोर दार फोडटनाची म्हायती इंग्लंडांत रावपी घरधनयाक कळिल्ली. ताणें घर राखप्याक सांगलें आनी तो येतकच चोर पळून गेल्ले. सीसीटीव्ही सर्व्हीलन्स सुरू जालें काय गुन्यांवकाराच्या मुखामळाचें मॅपींग, स्कॅनींग जातलें आनी ताचो फोटो देशभरांतले पुलीस यंत्रणे कडेन आसा जाल्यार ताची वळख पट्टली खंय. आपली वळख पटूं येता, ह्या भंयान गुन्यांवकार गोंयांत येवपाचे प्रकारूय उणे जावं येतात.
गोंयांत गुन्यांवकारीचें प्रमाण हिसपा भायर वाडलां. खंय ना खंय गुन्यांव जायत आसात. तातूंत फक्त भायलेच न्हय, तर गोंयकारूय सामील आसात. तेन्ना सगल्यांचीच म्हायती आशिल्ली डेटा बेस पुलिसां कडेन आसप गरजेचें. गुन्यांवकार फरारी जालो जाल्यार ती म्हायती देशभरांतल्या पुलीस स्टेशनांनी पावपाक जाय. गोंयांत काम- धंद्यां खातीर शेंकड्यांनी लोक येतात. खंयच्याय रेल्वे स्टेशनाचेर उबे रावल्यार कोणाकूय हें पळोवपाक मेळटलें. ह्या लोकांचेर नदर दवरपाक जाय. येता ते सगलेच गुन्यांवकार नासतात. तरीय कायद्यान तांची सगली म्हायती घेवपाक जाय. तांचे आड कसलोय गुन्यांव बी ना मूं, ताचो पुलिसांनी तपास करपाक जाय. ते खातीर तांकां भाड्यान दवरपी घरधनयांनी तांचे विशीं पुलिसांक कळोवप गरजेचें. पुलिसांची मान्यताय नासले बगर तांकां भाड्यान घर दिवप घातक थारूं येता. हालींच पुलिसांनी भाड्यान कोण रावतात, तें तपासपाक मोहीम सुरू केल्ली, तेन्ना कितल्याशाच लोकांनी भाडेकरूं विशीं पुलिसांक कळोवंकूच नाशिल्ल्याचें उक्तडार आयिल्लें. पुलिसांनी तांकां अटक करून मागीर सोडले. खरें म्हणल्यार तांकां भाड्यान दवरपी घरधनयांक दोन दीस पुलीस कोठयेंत दवरूंक जाय आशिल्लें. कारण हे विशीं फाटल्या साबार वर्सां सावन पुलीस आवाहन, जागृताय करीत आयल्यात. तरीय घरधनी भाड्याचे आशेन तांकां गुपचूप बिराडां दितात. कायद्यांत बसना, हें खबर आसून लेगीत ताचे कडेन आडनदर करतात.
पंचायती, पालिकांनी जागृत जावंक जाय. गांवांत कोण कितें करता, तें तांकां खबर आसूंक नाका? रातच्या वेळार सोरो पियेवन बोवाळ करप, केस्तांवां करप, लोकांच्या आंगार धांवून वचप, दुबावीत रितीन हेडप… हे विशीं गांवकारां बगर कोणाक चड बरें खबर आसतलें? कसल्याय कारणां वयल्यान ते मागीर एकमेकांक बडयतात आनी गांवाची शांतीकाय इबाडटा. खुनाचे प्रकार पसून घडल्यात. तेन्ना तांचो आदलो इतिहास पुलिसांक खबर आसप गरजेचो. समाजाची मजत मेळ्ळ्यार तो बेगीन कळटलो. आतां तंत्रज्ञान अत्याधुनीक जालां. गुन्यांवकाराची सगली म्हायती ताच्या फोटवां सयत वॅबसायटीर घालीत जाल्यार ती सोदप, सर्च करपी पुलिसांक सोंपें पडटलें…. आनी घडये गोंय गुन्यांवकार मुक्त जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
