भांगरभूंय | प्रतिनिधी
गोंयांनूच कित्याक आख्ख्या संवसारान नर्सीची मागणी आसा. केंद्र सरकारान लेगीत नर्सिंग संस्था वाडोवपाचो निर्णय घेतला. गोंयां भितर सरकारी नर्सिंग संस्था सोडली जाल्यार नर्सिंग करपाक सोदपी उमेदवाराक संद मेळनाशिल्ली. आतां पार्सेकर कॉलेज हरमल, वृंदावन कोलवाळ आनी साई संस्था साखळे अशा सुवातांचेर ह्यो संस्था उब्यो जाल्यात. हालींच प्रवेश घेवचे बाबतींत पयली फेरी जाली, आतां फुडले फेरयेंत जांकां हेर फाट्यांनी प्रवेश मेळना ते विद्यार्थी ह्या संस्थांनी प्रवेश घेतले, अशी अपेक्षा. पूण आनीक एक गजाल ह्या निमतान फुडें आयल्या ती म्हणल्यार टक्केवारी उणी आशिल्ल्या उमेदवारांक पूण नीट उत्तीर्ण जाल्या विद्यार्थ्यांक प्रवेश मेळटलो. आतां नीट परिक्षा पास जावप आनी बारावेचे परिक्षेंत 50 % गुण प्रवेश घेवपाक सोदपी विद्यार्थ्याक मेळूंक जाय. उणे गुण आशिल्ल्यांक प्रवेश दिवप, म्हळ्यार दर्जाचो विचार आमी करीनात काय, असो प्रस्न जायते जाणांक पडटा.
गुण उणे आशिल्ल्या उमेदवाराक प्रवेश दिवपाचो निर्णय अभियांत्रिकी फाट्यान ह्यान पयलीं जाला. ताचें खरें कारण म्हळ्यार शिक्षणाचो मोग न्हय तर विद्यार्थ्यांची संख्या वर्गांनी वाडची हो आसा. परिचारिका फाट्या भितर होच दुबाव जायते जाण उक्तायतात. खरें म्हळ्यार अशे फांटे हे मनशाच्या भलायके कडेन लागींचो सबंध आशिल्ले. तातूंत गुणवत्तेक महत्व दिवपाकूच जाय. पूण, प्रवेश घेतले उपरांत त्या विद्यार्थ्याक जर कोर्स जड गेलो तर? ताचे परिश्रम, वेळ आनी पयशे वतलेच, खेरीज त्यांचे भितर निर्शेवणी येवपाक शकता. आपल्याक विद्यार्थी जाय म्हूण आमी जर गुणवत्ते कडे काणोदोळो करपाक लागले तर लुकसान सगळ्यांचेंच जातलें. आसूं हो विचार प्रत्येकान करचो, अशी विनवणी. प्रत्येक संस्था आपल्याकडे भरपूर विद्यार्थी कशे आकर्षित जातले हे खातीर येवजण्यो करतात तांकां असलो विचार कसो येतलो?
एक हुशार विद्यार्थ्यां अभ्यास करता तो कित्याक ? प्रवेश मेळपाक जाय म्हूण. पूण अशे जर गुणवत्ते खातीर आमी तांचे कडेन आडनदर केली जाल्यार ताचें लुकसान सगळ्यांक सोंसचें पडटलें, अशें ताका तरी दिसता. कारणां कितेंय आसू पूण गुणवत्ते कडेन आमी आडनदर करपाक लागल्यात हें खरें. पळोवंक गेल्यार लोकांच्या जीवना कडेन जाचो संबंध येता ते फाटे मागीर कसलेय आसूं खरे नेमा प्रमाणूच जावपाक जाय अशें कांय जाणांचें मत. आरक्षणा खातीर काय टक्केवारी दिल्यात त्यो नेमा नुसार पूण हें सोडून जर स्वतःच्या काळजीक लागून आमी नेम कुशीक सारपाक लागले तर फुडें लुकसान कोणाचें जातलें, हो विचार आमी करपाक जाय. आमी आयचो विचार केलो म्हूण जालो ना.
इंग्लडाक फुकट जेवणाची येवजण करपाचें सरकारान थारायलें तेन्ना ताका बायलांनी विरोध केलो. कित्याक तर हे येवजणेक लागून आमी आळशी जातले हो तांचो मुद्दो आशिल्लो. तशे उणे गुण घेवनूय तांकां प्रवेश दिता जाल्यार कोणूच विरोध करपाक ना हें आमकां खबर आसा, पूण ताचो फुडलो परिणाम कितें जातलो हांचो विचार तज्ञांनी जरूर करचो. एकीकडे आमी गुणवत्ता निसरल्या म्हूण आरड मारतात, पूण दुसरे कडेन अशे प्रकार दिसता ताचे कितें? एकी कडेन परिक्षा पद्धती उणी जावपाक लागल्या काय विद्यार्थ्यांक तर ह्यो परिक्षा ना केल्यो तर बरें अशें दिसपाक लागलां. परिक्षा एके वाटेन तुमी तुमच्या विशयांत, अभ्यासांत गंभीर आसा काय नात हें पारखितात. जर उणे गुण लेगीत मिळून आमका प्रवेश मेळपाक लागलो तर कोण अभ्यास म्हूण कित्याक करतलो? भंय पयस जावपाक जाय म्हूण मारपेट करप हाची तरतूद ना, पूण परिक्षेची जरूर आसा. तीच जर आमी पयसो करपाक लागले तर शिक्षणाची फकांडां जातलीं अशें दिसता.
उसरां जे विद्यार्थी नर्सिंग कोर्साक प्रवेश घेतले तांचे फियेंत कांयच फरक आसचो ना. खेरीज तांका वेळुय उणो मेळटलो. ह्या फाट्यांत येवपी उमेदवारा भितर दया, करुणा हे गुण आसुकूच जाय. खेरीज दुयेंती, जाण्ट्यां कडेन कशे उलोवप तांचो आदर कसो करप हांचेंय बी गिन्यान जाय. हालींच भलायकी मंत्र्यांनी दोन नर्सीक सस्पेंड केल्ल्यो हें आमी विसरूंक फावना. कशें उलोवप हाचो आस्पाव अभ्यासक्रमांनी जावपाक जाय.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
