भांगरभूंय | प्रतिनिधी
किशोर शाहः सांखळी सरकारी म्हाविद्यालयांत संवसारीक गुणवत्ता सप्तक उमेदीन
भांगरभूंय । खबरां मेज
पणजीः अध्यापन प्रक्रिया सुदरावचे खातीर गुणवत्ता ही खूब म्हत्वाची. गुणवत्तेची सुरवात विचारान जाता, अशें आयडियाज लिमिटेड पणजीचे संचालक किशोर शाह हांणी सांगलें. गुणवत्ता हमी विभागा खाला कर्मचारी कल्याण समिती, कला, विज्ञान आनी वाणिज्य सरकारी म्हाविद्यालय सांखळी हांच्या जोडपालवान संवसारीक गुणवत्ता सप्तका निमतान शिक्षणांतले गुणवत्तेचें एकत्रिकरण ह्या विशयाचेर 11 ते 15 नोव्हेंबर ह्या काळांत आयोजीत केल्ले कार्यशाळेंत मुख्य मार्गदर्शक म्हीण ते उलयताले. ह्या वेळार म्हाविद्यालयाचे प्राचार्य डॉ. नामदेव गांवस, आयक्यूएडीचे संचालक डॉ. वैभव चिंदरकर, कर्मचारी कल्याण समितीची संयोजक डॉ. रोझालिना डिसिल्वा हाजीर आशिल्ली.
फक्त अध्यापनांत सुदारणा आनी कुशळटाय मेळोवपा खातीर हे कार्यशाळेचें आयोजन करूंक ना जाल्यार शिकोवपाचे प्रक्रियेंत विचारशील मनीस जावपाचे गूण विकसीत करप हें हे कार्याशाळेचें उदिश्ट आसा, अशें प्राचार्य डॉ. नामदेव गांवस हांणी सांगलें.
समाजाचे जडणघडणींत शिक्षकाचें योगदान खूब म्हत्वाचें आसा. बरो शिक्षक हो आदर्श पिळगी घडोवपाक शकता, डॉ. वैभव चिंदरकर हांणी सांगलें. तांणी बऱ्या शिक्षकाचें म्हत्व स्पश्ट केलें.
कार्यशाळेंत किशोर शाह हांणी संवसारभरांत चलिल्ल्या संवसारीक सप्तकाचें म्हत्व सांगलें. प्रभावी अध्यापनांत गुणवत्तेचें म्हत्व सांगतना शाह हांणी गुणवत्तेची व्याख्या, परिमाण, गरज, बरे संबंद हांचेर लक्ष केंद्रीत केलें. गुणवत्तेक भावना करून ताचो वापर चारित्र्य निर्मिती, जीण कुशळटाय आनी राष्ट्राचो उद्धार हाचेर तांणी उजवाड घातलो. तशेंच अध्यापनाच्यो वेगवेगळ्यो पद्दती वापरून वर्गांत हलकें वातावरण कशें निर्माण करपाक मेळटलें हाचेंय तांणी विश्लेशण केलें. प्रा. अलिशा सौझा हांणी सुत्रसंचालन केलें जाल्यार डॉ. गुरुप्रसाद नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
