भांगरभूंय | प्रतिनिधी
गों त भोवतेक घरा मुखार वा फाटल्यान मेकळो जागो आसल्यार ल्हानशें पोरसूं आसताच…. आनी तातूंत पोपाय पळोवपाक मेळटाच. ल्हान व्हड कुंड्यांनी सदाफुली, गुलाब, बटन, जास्वंदी हीं फुलांचीं झाडां पळोवन मन प्रसन्न जाता. केन्ना एकदां फूल फुलता आनी तें देवाक ओंपता अशें जाता. मागीर पोरसांत चिकू, ल्हानशी आमुल्ली, पोपाय, केळे अशीं झाडां आसप खरेंच बरें. . झाडां आमकां गोड म्होवाळ, रसरशीत फळां दितात. पोपायेचें झाड तर रोखडेंच वाडटा. कसल्याय मातयेन जाता. ताका सारें घालपाची गरज ना. दिसाक एक कळसो उदक घाल्यार पुरो. एकेक झाड शेंकड्यांनी पोपायो दितात. पिकी पोपाय बाजारांत साठ, शंबर रुपयांक खपता.
लक्षांत दवरपाची गजाल म्हणल्यार सकाळीं तोंड धुवून पोपाय खावप खरेंच बरे. रिकाम्या पोटार पोपाय खाल्यार कुडीची सैमिक शुद्धीकरण प्रक्रिया बरी जाता. पोपायेंत भरपूर उदक आसता, जें आमचे कुडींतलें वायट पदार्थ भायर उडयता. जाय त्या लोकांक जेवले बरोबर पोट फुगल्या सारकें दिसता. जडपणा, सुस्ती येता. ह्या वेळार पोपाय खावची. पचनसंस्था बरें काम करता. अॅसिडीटी बी उणी जाता.
कुडीची कात बरी उरपाक जाय जाल्यार पोपाय खावची. तातूंत व्हिटामीन सी, बिटा कॅरोटीन खूब प्रमाणांत आसता. सकाळची पोपाय खावपाची सवय केल्यार मुंमरां वतात, कात मोव जाता. चकचकता. मागीर कसलीय फ्रेस किम, लोशन लावपाची गरज ना. पोपायेंत व्हिटामीन सी खूब आसता. पोपायेच्यो फोडी नेमान खायत जाल्यार भूक लागना, प्रतिकार शकत वाडटा. पोपायेंत फोलेट पोटेशियम फायबर खूब आसता. म्हणटकच रक्तदाब निमंत्रणांत रावता. थकवो, आळस येत जाल्यार पोपाय खावपाची. च्या, काॅफी अर्द वरान घेवप. पोपायेंत सैमीक गोडसाण आसता. ती साकरेचो थर वाडयना. ती खातकूच पोट टम्म फुगता. बाकी हेर खावपाची गरज पडना. अशें हें गुणधर्मी फळ. सैमाची मोलादीक देणगी. सादें दिसपी नारिंगी रंगाचें हें फळ जाय ते फावटी तें मेजार दवरिल्लें आसता. चड करून आयची पिळगी केळें, आपोल खातात. मात, पोपाये कडेन आडनदर करतात. हें सामकें चूक. पोपय हो जण एकल्याचे कुडीचो इश्ट. पोपायेचे खूबच फायदे आसात, हातूंत दुबाव ना.
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
