भांगरभूंय | प्रतिनिधी
गोडेंमूत आशिल्ल्यांनी, वजन कमी करपाक सोदप्यांनी चड केळीं खावपाक जायनात.
गोंयांत भोंवतेक सगले कडेन केळी दिश्टी पडटात. पोरसां, कुळागरांनी चड. जांच्या घरा कुशीक जागो आसा, तांणी केळमे लायल्यात. लांब पाचव्या पानाच्यो केळी, तांचेर लोंबपी व्हडले घड आनी ताका लागिल्लीं शे- देडशें केळीं पळोवन मन खोशी जाता. सैम आमकां कितलें भरभरून दिता, ताची जाणीव जाता.
गोंयांत केळ्यांची व्हड प्रमाणांत लागवड जाता. तीं खपतातूय बरी. चार पयशे मेळटा. गरिबांच्या पोटाची खळगी भरता. केळमो खंयच्याय जाग्यार वाडटा. ताका कश्ट घवचे पडनात. सद्दां एक कळसो भर उदक ताच्या मुळांत घाल्यार पुरो. कपडे, आयदनां घाशिल्लें उदक वता ताचे कुशीक ते लायल्यार गरगरीत वाडटात.
केळ्यांच्यो खूब जाती आसात. सालदाटी, रसपाळी, मंयडोळी, वेलचीं, सावरबोडीं, खाप्रीं… बाजारांत तांकां मागणी आसा. पिकिल्लें केळें तर सगल्यांकूच आवडटात. आमचीं बायलां कडक उपास करतात, तेन्ना फक्त दोन कळीं आनी पेलोभर दूद पितात. ल्हान भुरग्याक रसपाळें केळें मुड्डून दितात. केळ्याचो शेक करतात. मंयडोळ्या केळ्यांचो साजूक तूप घालून हालवो करतात. हरव्या खाप्री केळीं भलायकेक बरीं. हिग, सांसवांची फोडणी दिवन ताची भाजी करतात. केळ्याची साल काडून उकडून केल्लें भरत. सावरबोंडी केळ्याचीं कापां करून खातात.
केळ्याचे सालीच्या भितरल्या धव्या भागाचो रोस काडून सद्दां पियेत जाल्यार गोडेंमुत नियंत्रणांत येता. केळ्यांत मीठ उणें आसता. ते खातीर पथ्याच्या जेवणांत केळीं सामकीं गरजेचीं. शक्तीवर्धक फळ म्हूण केळें फामाद. हड्ड्यांत जळजळटा, अॅसिडिटीची समस्या आसल्यार सद्दां एक केळें खावचें. जेवतक प्रत्येकान एक केळें खावचें.
कुडीक उर्जा दिवपाचें काम केळें करता. एका मध्यम आकाराच्या केळ्यांत 12 ते 14 ग्राम साकर आसता. व्यायाम करपाक वचपी तरणाट्यांनी केळें खावप बरें. कारण केळ्यांतली सैमीक साकर ताका उर्जा दिता. गोडेंमूत आशिल्ल्यांनी, वजन कमी करपाक सोदप्यांनी चड केळीं खावपाक जायनात. कारण केळ्याक लागून ग्लुकोजाची पातळी वाडटा. तांणी भलायकी सांबाळून केळें खावचें.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
