भांगरभूंय | प्रतिनिधी
शिमला, खबरां संस्था: हिमाचल प्रदेशांतल्या गुडिया बलात्कार- खून प्रकरणांत पुलीस बंदखणींतल्या आयजीं सयत ८ पुलीस कर्मचार्यांक जल्मठेपेची ख्यास्त दिल्या. चंडिगढाच्या सीबीआय न्यायालयान निकाल दितना ह्या सगळ्यांक दोशी घोशीत केल्ले.
तांकां एक- एक लाख रुपयांचो दंडूय दिला
ख्यास्त दिल्ल्यां मदीं हिमाचलचे आयजी जहूर एच झैदी हाचे सयत डीएसपी मनोज जोशी, एसआय राजिंदर सिंग, एएसआय दीप चंद शर्मा, हेड कॉन्स्टेबल मोहन लाल आनी सुरत सिंह, हेड कॉन्स्टेबल रफी मोहम्मद आनी कॉन्स्टेबल रणित ह्या सगल्यांक जल्मठेपीची ख्यास्त मेळ्ळ्यात तर शिमलाचे तेन्नाचे एसपी डी डब्ल्यू नेगी हाची उण्या पुराव्यांक लागून सोडिल्लो.
कितें जाल्लें?
२०१७ त कोटखई गांवांत एके नेण्टे चलयेचेर बलात्कार करून तिचो खून केल्लो. हे विशीं पुलिसांनी आरोपी सुरजाक ताब्यांत घेतलो. थंय सुरजाचेर अत्त्याचार केल्ल्यान ताका मरण आयलें. उपरांत पुलिसांनी ताच्या मरणाक दुसरो आरोपी राजू हाका थारायलो. मात, लॉकअपांत सुरजाक मरण आयले उपरांत तिडकल्ल्या लोकांनी कोटखई पुलीस स्टेशनाक उजो घालपाचो यत्न केलो. उपरांत तेन्नाचे मुख्यमंत्री वीरभद्र सिंह हांणी हें प्रकरण सीबीआय कडेन दिलें. हे विशीं सीबीआयन आयजी आनी एसपी शिमला हाचे सयत ९ पुलीस अधिकारी आनी कर्मचार्यांक अटक केल्ली.
मजगतीं, ४ जुलय २०१७ दिसा शिमला जिल्ह्यांतली कोटखईची १६ वर्सां पिरायेची (गुडिया : काल्पनीक नांव) चली शाळेंतल्यान परततना बेपत्ता जाली. ६ जुलयाक कोटखईच्या तांडी रानांत तिची कूड सांपडली. बलात्कार जाले उपरांत तिचो खून केल्ल्याचें तपासा उपरांत समजलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
