भांगरभूंय | प्रतिनिधी
महेसाणा, खबरां संस्था: आपलो हेतू सादचे खातीर गुजरातांत महेसाणा हांगा दोगां तरणाट्यांची बळयां नसबंदी केल्ल्याची घडणूक मुखार आयली. भलायकी कर्मचार्यांनी एका आंकवार आनी एका लग्न जाल्ल्या तरणाट्याची नसबंदी केली. हे खातीर तांकां सोरोय दिलो.
धनाली गांवांतल्या एका ३१ वर्सां पिरायेच्या तरणाट्याचें म्हयन्या उपरांत लग्न जावपाचें आशिल्लें. मात हे घडणुके उपरांत चलयेच्या घरच्यांनी हें लग्न मोडलें. जिल्लो भलायकी अधिकारी डॉ. महेश कपाडिया आनी तांच्या पंगडान धनाली गांवांत रावपी एका आंकवार तरणाट्याच्या नसबंदी प्रकरणाचो तपास केलो. हातूंत जायते वायट प्रकार मुखार आयले. अहमदाबादच्या एका हॉस्पिटलान आयुष्मान येवजणेचे पयशे लोकां कडल्यान घेवपा खातीर निरोगी लोकांची बळयां अँजिओग्राफी/अँजिओप्लास्टी केल्ली.
बेशुद्ध आसतना केली नसबंदी
धनाली गांवांतल्या एका तरणाट्याच्या नसबंदीचो हो फॉर्म सुरत मुळावें भलायकी केंद्र, धनालीच्या दादलो भलायकी कर्मचार्यान भरलो. ताच्या नसबंदी ऑपरेशना खातीर मानक प्रक्रिया पाळूंक ना. तो बेशुद्ध आसतना नसबंदी केली. दुसर्या प्रकरणांत नवी शेडवी गांवांतल्या तरणाट्याचे नसबंदीक मान्यताय दिल्ली. मात अशा प्रकरणांत बायलेचेंय मत घेवपाचो नेम आसा, तो पाळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
