गुजरात पंगड बरे स्थितींत

भांगरभूंय | प्रतिनिधी

ओपनर प्रियांक पांचाळान (नाबाद 150) नोंदयिल्ल्या नाबाद दीड शेंकड्याच्या नेटार गुजरातान गोंया आड चालू आशिल्ले चार दिसांचे रणजी मॅचीच्या दुसऱ्या दिसा आपलो शेक दवरलो.

पर्वरी क्रिकेट अकादमीचेर चालू आशिल्ले मॅचींत गोंयचो पयलो डाव सगले बाद 317 धांवड्यांचेर सोंपलो. ताका जाप दितना गुजरातान दुसऱ्या दिसाचो खेळ सोंप मेरेन 5 विकेटी वगडावन 281 धांवड्यो करून खडेगांठ जाप दिली.

गुजराताक पयल्या डावांत आघाडी घेवपा खातीर अजून 37 धांवड्यांची गरज आसा आनी ताच्यो पांच विकेटी बाकी आसात. ते पयलीं 9 बाद 309 धांवड्यां वयल्यान खेळपाक सुरवात करपी गोंयचो पयलो डाव 317चेर सोंपलो. गुजराता खातीर मुखेली चिंतन गजान 3, प्रियजीत जडेजा आनी सिद्धार्थ देसाय हाणें दरेकी 2 विकेटी घेतल्यो. नागवासवल्ला आनी रवी बिष्णॉयी हांकां दरेकी एक विकेट फावो जाली.

गुजराताक लेगीत बरी सुरवात करपाक जमली ना. 75 धांवड्यांचेर ताचे तीन म्हत्वाचे बॅट्समन बाद जाल्ले. दीपराज गांवकारान आदित्य पटेलाक धांवबाद केलो. त्या वेळार गुजराताची धांवसंख्या 44 आशिल्ली. ते उपरांत सनप्रीत बग्गा लेगीत चार धांवड्यांच्या अंतरान धांवबाद जालो. ताका सुयश प्रभुदेसायान धांवबाद केलो. विकेटकीपर बॅट्समन हेत पटेलाक लक्ष्य गर्गान बाद केलो. के व्ही सिद्धार्थान ताची कॅच धरली.

ते उपरांत प्रियांक पांचाळान उमंग रोहितकुमार (37) हाका वांगडा घेवन गुजराताचो डाव सांबाळ्ळो. दोगांयनी चवथे विकेटी खातीर 109 धांवड्यांची म्हत्वाची भागिदारी केली. ही जोडी मुखेली दर्शन मिशाळान फोडली. ताणें उमंगाक बोल्ड केलो. ते उपरांत आयिल्ल्या मनन हिंगराजियाक मोहित रेडकारान बोल्ड केलो.

5 बाद 214 धांवड्यां वयल्यान प्रियांकान रवी बिष्णॉय वांगडा मेळून डाव मुखार व्हेलो. तांणी दोगांयनी गोंयाक आनीक विकेट मेळोवपाक दिली ना. दोगांयनी मेळून अजून मेरेन 67 धांवड्यांची भागिदारी केल्या. प्रियांकान 120वे पयले श्रेणीतलो 27वो शेंकडो पुर्ण केलो. गोंया वतीन लक्ष्य गर्ग, दर्शन मिशाळ आनी मोहित रेडकार हाणें एकेक विकेट घेतली.

धांवतकटोः गोंय (पयलो डाव) 9 बाद 309 धांवड्यां वयल्यान 84.2 ओव्हरींनी सगले बाद 317 धांवड्यो (लक्ष्य गर्ग 6, हेरंब परब 10 धांवड्यो, चिंतन गजा 3-56, प्रियजीत जडेजा 2-64, सिद्धार्थ देसाय 2-47, अर्झान नागवासवल्ला 2-47, रवी बिष्णॉय 1-56)

गुजरात, (पयलो डाव) 79 ओव्हरींनी 5 बाद 281 धांवड्यो (प्रियांक पांचाळ खेळटा 150, आदित्य पटेल 13, सनप्रीत बग्गा 0, हेत पटेल 18, उमंग रोहितकुमार 37, मनन हिंगराजिया 17, रवी बिष्णॉय खेळटा 30).

बॉलींगः लक्ष्य गर्ग 9.1-1-42-1, अर्जुन तेंडुलकर 12-2-25-0, दीपराज गांवकार 12-1-42-0, हेरंब परब 17.5-3-60-0, दर्शन मिशाळ 19-3-67-1, मोहित रेडकार 9-0-35-1.