भांगरभूंय | प्रतिनिधी
गुजरात टायटन्सान अंदूंचे इंडियन प्रिमियर लिगेचे (आयपीएल) प्ले ऑफांत सुवात मेळोवपी पयलो पंगड थारलो. ताणें घरच्या मैदानाचेर खेळटना सनरायझर्स हैदराबादाक 34 धांवड्यांनी हारयलो.
गुजरातान दिल्ले 189 धांवड्यांचे मोखीचो फाटलाव करतना सनरायझर्स हैदराबादान 20 ओव्हरींनी 9 विकेटी वगडावन 154 धांवड्यो केल्यो.
गुजराताच्या शुभमन गिलाच्या शेंकड्या उपरांत मोहम्मद शमी आनी मोहित शर्मा हांणी सनरायझर्साची बिटकी कवळ्ळी. हे हारीक लागून सनरायझर्साचें प्ले ऑफांत सुवात मेळोवपाचें सपन भंगलें.
शुभमन गिलाच्या शेंकड्या उपरांत लेगीत गुजराताक व्हड धांवसंख्या उबारपाक जमली ना. गिलान 58 बॉलांनी 13 चवके आनी एक सक्याचे मजतीन 101 धांवड्यो केल्यो. साई सुदर्शनान 47 धांवड्यो करतना दुसरे विकेटी खातीर गिला वांगडा 147 धांवड्यांची भागिदारी केली. पूण, सुदर्शनाची विकेट पडल्या उपरांत हैदराबादाच्या बॉलरांनी आपलो शेक दवरपाक सुरवात केली. भुवनेश्वर कुमारान 30 धांवड्यो दिवन 5 विकेटी घेतल्यो. गुजराताक 9 विकेटी वगडावन 188 धांवड्यो करप शक्य जाल्यो.
शुभमाचे बॅटिंगे उपरांत मोहम्मद शमीन पावर प्लेंत 17 धांवड्यो दिवन 3 विकेटी घेवन हैदराबादाक बॅकफुटाचेर धुकल्लो.
हैदराबादाचो अर्दो पंगड तबूंत गेल्लो. पूण, हॅन्रीच क्लासेनान 35 बॉलांनी अर्द शेंकडो नोंदयलो, तशेंच भुवनेश्वर कुमारा वांगडा मेळून सनरायझर्साची आस्त जिवी दवरपाचो यत्न केलो.
दोगांयनी 68 धांवड्यांची भागिदीर केली. अखेरेक ही जोडी शमीन फोडली. क्लासेनान 44 बॉलांनी चार चवके आनी तीन सक्यांचे मजतीन 64 धांवड्यो करून कॅच बाद जालो. ते उपरांत भुवनेश्वर 27 धांवड्यो करून तंबूंत परतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
