गुजरात टायटन्साचें सोंपें जैत

भांगरभूंय | प्रतिनिधी

सध्याचो वस्ताद गुजरात टायटन्सान इंडियन प्रिमियर लिगेचे (आयपीएल) 48वे मॅचींत राजस्थान रॉयल्सा आड आपलो शेक दवरलो. बॉलरांनी आपली भुमिका वेवस्थीत सांबाळ्ळ्या उपरांत गुजराताच्या ओपनरांनी बरी बुन्याद घालून दिली आनी राजस्थानाक सहज हारयलो. मुखेली हार्दिक पांड्याक चड ताकतीक जाल्ल्याची दिसली. ताणें अॅडम झम्पाक एके ओव्हरींत 24 धांवड्यांचो पावस घालो.

राजस्थान रॉयल्सान दिल्ली 119 धांवड्यांची मोख गुजरातान 13.5 ओव्हरींनी फकत 1 विकेट वगडावन मेळयली.

टॉस जिखून पयलीं बॅटींग करपाचो राजस्थान रॉयल्साचो निर्णय ताका बरोच म्हारग पडलो. राशिद खान आनी नूर अहमद ह्या स्पिनरांनी आपल्या तालांचेर बॅट्समनांक नाचयले.

यशस्वी जैस्वाल (14) आनी संजू सॅमसन (30) ही जोडी बरी खेळटाली. पूण, ताळमेळ चुकिल्ल्यान यशस्वी धांवबाद जालो आनी गुजरातान मॅचीचेर आपली पकड मेळोवपाक सुरवात केली.

जॉस बटलर (8), आर आश्विन (2), रियान पराग (4), ध्रुव जुरेल (9), शिमरोन हेटमायर (7) हांकां दोट्टी धांवडी लेगीत करपाक जमली ना. ट्रॅण्ट बोल्टान म्हत्वाच्यो 15 धांवड्यो केल्यो. मोहम्मद शमीन ताका बोल्ड करून राजस्थान रॉयल्साचो डाव 17.5 ओव्हरींनी 118 धांवड्यांचेर सोंपयलो.

मोखीचो फाटलाव करपी शुभमन गिल आनी वृद्धिमान साहा हांणी सहज रितीन धांवड्यो केल्यो. हे खेपे राजस्थानाचो मुखेली संजू सॅमसनाची रणनिती ह्या दोगांयनी अपेशी थारायली. दोगांयनी आकर्शक शॉर्ट खेळून राजस्थानाच्या बॉलरांक अपेशी केले.

पावर प्ले उपरांत संजून स्पिनरांक हाडले. एके वटेन गुजरात टायन्साच्या स्पिनरांनी जबरदस्त प्रदर्शन केल्लें, पूण संजून आपल्या स्पिनरांक हाडपाक उशीर केलो. ताका लागून गिल आनी साहा हांकां खेळपट्टीचेर स्थिरावपाक जमलें. 10वे ओव्हरींत अखेरेक युजवेंद्र चहलान 71 धांवड्यांचेर ही जोडी फोडली. शुभमन 36 धांवड्यांचेर स्टंप बाद जालो. हार्दिक पांड्यान 11वे ओव्हरींत तीन सके आनी एक चवको मारून मॅच पुर्णपणान गुजराता वटेन घुंवडायली.

गुजरातान 12वे ओव्हरींत शंबर धांवड्यो पुर्ण केल्यो. उरिल्ल्या बॉलांनी तांकां फकत 20 धांवड्यो करपाच्यो आशिल्ल्यो. गुजरात 14 गुणां सयत गुणतकट्यांतली पयली सुवात आनीक घटमूट केली. हार्दिकान 15 बॉलांनी 39 धांवड्यो केल्यो. साहान नाबाद 41 धांवड्यो केल्यो. गुजरातान 13.5 ओव्हरींनी मॅच जिखली.