भांगरभूंय | प्रतिनिधी
इंडियन प्रिमीयर लिगेच्या (आयपीएल) 16व्या हंगामांत गुजरात टायटन्सान आपली सेगीत दुसरी मॅच जिखली. काल जाल्ले मॅचींत ताणें येजमान दिल्ली कॅपिटल्साक 6 विकेटींनी हारयलो.
दिल्ली कॅपिटल्सान दिल्ले 163 धांवड्यांचे मोखीचो फाटलाव करपी गुजरातान 18.1 ओव्हरींनी 4 विकेटी वगडावन केलो.
गुजराताच्या बॉलरां उपरांत बॅट्समनांनी लेगीत जबरदस्त प्रदर्शन केलें. तिसरे सुवातेर बॅटिंगेक आयिल्ल्या साई सुदर्शनान 48 बॉलांनी नाबाद 62 धांवड्यो केल्यो. हातूंत चार चवक्यांचो आनी दोन सक्यांचो आस्पाव आशिल्लो. ताचे खेरीत विजय शंकरान 29 धांवड्यांचें योगदान दिलें, जाल्यार डॅव्हिड मिलरान नाबाद 31 धांवड्यांची खेळी केली.
ते आदीं अरुण जेटली स्टेडियमाचेर टॉस हारल्या उपरांत दिल्ली कॅपिटल्स पयलीं बॅटींग करपाक मैदानांत देंवलो. पूण, गुजरात टायटन्सान सुरवाती सावन ताचेर आपलो शेक दवरपाक सुरवात केली. ताच्या बॉलरांनी दिल्लीच्या एकाय बॅट्समनाक व्हड खेळी करपाक दिली ना. दिल्ली वतीन मुखेली डॅव्हिड वॉर्नरान 37, सरफराज खानान 30 आनी अक्षर पटेलान 36 धांवड्यो केल्यो. ह्या तिगां खेरीत दिल्लीच्या एकाय बॅट्समनाक 20चो आंकडो लेगीत हुपपाक जमलो ना. तरी पूण, दिल्लीन निर्धारीत 20 ओव्हरींनी 8 विकेटी वगडावन 162 धांवड्यो केल्यो.
गुजरात टायटन्सा वतीन राशिद खान आनी मोहम्मद शमी हांणी उत्कृश्ट प्रदर्शन करतना दरेकी तीन विकेटी घेतल्यो. शमीन दिल्लीक सुरवातीक धपके दिले जाल्यार राशिद खानान मध्यक्रम गडगडावन उडयलो. ह्या दोगां आड दिल्लीच्या एकाय बॅट्समनाक व्हड शॉर्ट मारपाक जमलें ना.
हे मॅची खातीर गुजरात टायटन्सान जखमी केन विलियम्सनाचे सुवातेर डॅव्हिड मिलराक पंगडांत घेतला जाल्यार विजय शंकराचे सुवातेर बी साई सुदर्शनाक सुवात दिल्या.
दुसरे वटेन दिल्ली कॅपिटल्सान रोव्हमन पॉवेलाक पंगडांतल्यान वगळायला. ताचे सुवातेर दक्षीण आफ्रिकेच्या एनरिच नॉर्टजे घेतला. तशेंच बंगालचो विकेटकीपर बॅट्समन अभिषेक पोरेलाक लेगीत निमाण्या इकरांत सुवात दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
