भांगरभूंय | प्रतिनिधी
इंडियन प्रिमियर लिगेचे (आयपीएल) णववे मॅचींत गुजरात टायटन्सान मुंबय इंडियन्साक 36 धांवड्यांनी हारयलो.
गुजरात टायटन्सान दिल्ले 197 धांवड्यांचे मोखीचो फाटलाव करपी मुंबय इंडियन्साक 20 ओव्हरींनी 6 विकेटी व्हगडावन 160 धांवड्यो करप शक्य जाल्यो. सूर्यकुमार यादवान 48 धांवड्यो केल्यो, तिलक वर्मान 39 धांवड्यांचें योगदान दिलें. हांकां सोडले जाल्यार मुंबयच्या एकाय बॅट्समनाक व्हड खेळी करपाक जमली ना.
ते आदीं टॉस हारल्या उपरांत पयलीं बॅटींग करतना गुजरात टायटन्सान निर्धारीत ओव्हरींनी 8 विकेटी व्हगडावन 196 धांवड्यो केल्यो. साई सुदर्शनान 63, जोस बटलरान 39 आनी शुभमन गिलान 38 धांवड्यांचें योगदान दिलें.
गुजरातान बरी सुरवात केली. साई सुदर्शन आनी शुभमन गिल हांणी पयले विकेटी खातीर 78 धांवड्यांची भागिदारी केली. गिलान 27 बॉलांनी 38 धांवड्यो केल्यो. बटलरान येना फुडें आक्रमक बॅटींग करपाक सुरवात केली. ताका लागून गुजरातान 10 ओव्हरींनी 92 धांवड्यो केल्यो. बटलर 14वे ओव्हरींत बाद जालो. ताणें 24 बॉलांनी पांच चवके आनी एका सक्याचे मजतीन 39 धांवड्यो केल्यो. शाहरुख खान (9) रोखडोच बाद जालो. पूण, साई सुदर्शनान एक बाजू सांबाळून धरली. ताणें पंगडाचो स्कोर 170 मेरेन व्हेलो. अखेरेक तो 41 बॉलांनी चार चवके आनी दोन सके मारून 63 धांवड्यांचेर बाद जालो. मुंबय इंडियन्सान अखेरच्या ओव्हरींनी सातत्यान विकेटी घेवन गुजराताक 200चो आंकडो हुपपाक दिलो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
