गुजरात टायटन्साक म्हत्वाचें जैत

भांगरभूंय | प्रतिनिधी

येजमान गुजरात टायटन्सान सध्याचो वस्ताद चेन्नय सुपरकिंग्साक 35 धांवड्यांनी हारोवन आयपीएलाच्या प्ले ऑफांतली आपली आस्त कायम राखली.

हांगाच्या नरेंद्र मोदी स्टेडीयमाचेर जाल्ले मॅचींत टॉस हारल्या उपरांत पयलीं बॅटींग करतना गुजरात टायटन्सान मुखेली शुभमन गील आनी साई सुदर्शन हांच्या आकर्शक शेंकड्यां नेटार निर्धारीत 20 ओव्हरींनी 3 विकेटी व्हगडावन 231 धांवड्यो केल्यो. ताचो फाटलाव करतना चेन्नय सुपरकिंग्सान 20 ओव्हरींनी 8 विकेटी व्हगडावन 196 धांवड्यां मेरेन मजल मारली.

आयपीएलांतलें आव्हान कायम दवरपाक गुजराताक जैत गरजेचें आशिल्लें. चेन्नय वतीन डॅरल मिचेल (63) आनी मोईन अली (56) खर संघर्श केलो. पूण, तांकां आपल्या पंगडाक जैत मेळोवन दिवपाक जमलें ना. मोहीत शर्माच्या घातक बॉलिंगे मुखार चेन्नयच्या बॅट्समनांक खेळपट्टीचेर तग धरपाक जमलो ना. ताणें तीन विकेटी घेवन जैतांत मोलादीक योगदान दिलें.

गुजरातान दिल्ले 232 धांवड्यांचे मोखीचो फाटलाव करतना चेन्नयच्या बॅट्समनांक नाकापुरो जालें. इम्पॅक्ट प्लेयराच्या रुपान आयिल्लो अजिंक्य रहाणे फकत एक धांवडी करून तंबूंत परतलो. ते उपरांत रचीन रवींद्र (1), ऋतुराज गायकवाड (0), शिवम दुबे (21), रवींद्र जडेजा (18) आनी मिचेल सॅण्टनर (0) हे लेगीत अपेशी थारले.

अखेरच्या कांय बॉलांनी महेंद्रसिंग धोनी आक्रमक बॅटींग केली. ताणें 11 बॉलांनी तीन सके आनी एका चवक्याचे मजतीन नाबाद 26 धांवड्यो केल्यो. गुजराताच्या जैतान रॉयल चॅलेंजर्स बंगळुरूचें लेगीत प्ले ऑपांत पावपाचें आव्हान कायम उरलें.

ते आदीं मुखेली शुभमन गील आनी साई सुदर्शन हांचे आक्रमक बॅटिंगे नेटार गुजरात टायटन्सा धांवड्यांचो दोंगर उबारलो. साई सुदर्शनान 103 आनी शुभमन गीला 104 धांवड्यांची खेळी केली. ते उपरांत चेन्नय सुपरकिंग्सान अखेरच्या ओव्हरींनी मॅचींत पुनरागमन केलें. गुजरातान निर्धारीत 20 ओव्हरींनी 3 विकेटी व्हगडावन 231 धांवड्यो केल्यो.

दोगांयनी पयले विकेटी खातीर 210 धांवड्यांची भागिदारी केली. शुभमन आनी सुदर्शन हाणें आयपीएलाच्या इतिहासांत पयले विकेटी खातीर केल्ले व्हड भागिदारीची बरोबरी केली.

2022त क्विंटन डी कॉक आनी लोकेश राहुल हे जोडयेन लखनौ सुपर जायण्ट्सा खातीर पयले विकेटी खातीर 210 धांवड्यांची भागिदारी केल्ली.

अखेरेक 18वे ओव्हरींत चेन्नय सुपरकिंग्साक येस आयलें. साई सुदर्शनाच्या रुपान चेन्नयक पयली विकेट फावो जाली. तुषार देशपांडेन सुदर्शनाक बाद केलो. सात सके आनी पांच चवक्यांचे मजतीन सुदर्शनान फकत 51 बॉलांनी 103 धांवड्यो केल्यो. जाल्यार शुभमनान 50 बॉलांनी आपलो शेंकडो पुर्ण केलो. आयपीएलाच्या इतिहासांतलो शंबरावो शेंकडो शुभमनान नोंदयलो. ताणें 55 बॉलांनी स सके आनी णव चवक्यांचे मजतीन 104 धांवड्यो केल्यो.

मजगतीं, साई सुदर्शनान आपले खेळीन आदलो मास्टर ब्लास्टर सचिन तेंडुलकराचो आनी चेन्नय सुपरकिंग्साचो मुखेली ऋतुराज गायकवाडाचो आयपीएलांतलो एक विक्रम मोडलो. सुदर्शनान आयपीएलांत 25 डावांनी 1 हजार धांवड्यो पुर्ण केल्यो. सचिन तेंडुलकराक आनी ऋतुराज गायकवाडाक हो पांवडो हुपपाक 31 डाव खेळचे पडिल्ले.