भांगरभूंय | प्रतिनिधी
गुजरात जायण्ट्सान बायलांचे प्रिमियर लिगेंत (डब्ल्यूपीएल) युपी वॉरियर्साक 8 धांवड्यांनी हारयलो. ह्या जैता सयत गुजरात जायण्ट्साची प्ले ऑफांत सुवात मेळोवपाची आपली आस्त कायम राखली. गुजरात जायण्ट्स आपली निमाणी मॅच दिल्ली कॅपिटल्सा आड 13 मार्चाक खेळटलो.
हांगाच्या अरुण जेटली मैदानाचेर गुजरातान टॉस जिखून पयलीं बॅटींग करपाचो निर्णय घेतलो आनी निर्धारीत 20 ओव्हरींनी 8 विकेटी वगडावन 152 धांवड्यो केल्यो. मोखीचो फाटलाव करपी युपी वॉरियर्साक 20 ओव्हरींनी 5 विकेटी वगडावन 144 धांवड्यो करप शक्य जाल्यो. शबनम शकिलाची प्लेयर ऑफ द मॅची खातीर निवड जाली. तिणें 11 धांवड्यो दिवन 3 विकेटी घेतल्यो.
गुजराताच्या जैतान डब्ल्यूपीएलाचे प्ले ऑफाची चुरस वाडली. सध्याचे स्थितींत तीन पंगडांक प्ले ऑफाची पात्रताय मेळोवपाची संद आसा. दिल्ली कॅपिटल्स आनी मुंबय इंडियन्स पयलीं प्ले ऑफाक पात्र जाल्यात. एके सुवाते खातीर रॉयल चॅलेंजर्स बंगळुरू, गुजरात जायण्ट्स आनी युपी वॉरियर्स हांचे मदीं चुरस आसा.
बंगळुरूचे स गूण आसात. तो आपली निमाणी मॅच मुंबय इंडियन्सा आड खेळटलो. जर बंगळुरू ही मॅच जिखता तर तो प्ले ऑफाक पात्र जातलो. अशे स्थितींत गुजरात आनी युपीचें आव्हान सोंपतलें.
बंगळुरू हारता जाल्यार युपी आनी गुजरात हांची आस्त जिवी उरतली. कारण युपीचे स गूण आसात आनी गुजरात आपली निमाणी मॅच जिखून स गुणां मेरेन पावतलो.
बंगळुरू आनी गुजरात हे दोनूय पंगड हारचे अशी युपीची आस्त आसतली. बंगळुरू आपले निमाणे मॅचींत मुंबय इंडियन्सा कडल्यान हारची अशी प्रार्थना गुजरात करता आसतलो. तशें जालें जाल्यार गुजराताक आपले निमाणे मॅचींत दिल्ली कॅपिटल्साक व्हडा फरकान हारोवचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
