भांगरभूंय | प्रतिनिधी
अहमदाबाद, खबरां संस्था ः गुजरात माध्यमीक आनी उच्च माध्यमीक शिक्षण मंडळान (जीएसईबी) अंदूं घेतिल्ल्या धावेच्या परिक्षेत 99.70 टक्के गूण मेळोवन राज्यांत पयल्या क्रमांकाचेर आयल्ले चलयेक निकाला उपरांत चवथ्या दिसाच ब्रेन हॅमरेजाक लागून मरण आयले.
धावेची परिक्षा पास जावपाचे ध्येय दवरून विद्यार्थी दीस- रात अभ्यास करतात. ह्या विद्यार्थ्यां मदले जायते जाण दोतोर, अभियंते, आयएएस, आयपीएस जावपाचें सपन पळयतात. तशेंच तें तयारीय करतात. अशीच तयारी केल्ल्या चलयेचें आनी तिच्या आवय-बापायचें सपन अर्दवट उरलें. गुजरात मंडळाच्या धावेच्या परिक्षेंत पयलें सुवातेर आयिल्ली चली निकाला उपरांत फकत ४ दीस जगले. 11 मे दिसा धावेच्या वर्गाचो निकाल जाहीर जाले उपरांत ही चली आनी तिच्या कुटुंबाक खोशी जाली. कारण तिणें 99.70 टक्के गुण मेळोवन राज्यांत पयली सुवात मेळयल्ली. पूण, फकत 4 दिसांनी म्हळ्यार 15 मे दिसा विद्यार्थी हीर घेतिया हिका मरण आयिल्ल्यान कुटुंबाक धक्को बसला. विशेश म्हळ्यार गणितांत तिका शंबरांतले शंबर गूण मेळिल्ले.
गुजरात मंडळाच्या यत्ता धावेत टॉपर आशिल्ल्या मोरबीच्या हीर हिका ब्रेन हॅमरेज जाल्लो आनी कांय म्हयन्या आदीं राजकोटांतल्या खाजगी हॉस्पिटलांत तिचेर शस्त्रक्रिया केल्ली. ऑपरेशन उपरांत डिस्चार्ज दिवन ती घरा आयली. ते उपरांत सप्तका आदीं तिका परतून स्वास घेवपाक आनी काळजाचे त्रास जावंक लागले. उपरांत तिका हॉस्पिटलाच्या आयसीयूंत दाखल केल्ले.
हाचे उपरांत एमआरआय अहवालांत हीराचो 80 ते 90 टक्के मेंदू काम करपाक बंद जाल्ल्याचें स्पश्ट जालें. ते भायर बुधवारा तिचें काळीजूय काम करपाक बंद जालें आनी ताका लागून तिका मरण आयलें. तिच्या मरणा उपरांत तिच्या आवय-बापायन तिचे दोळे आनी अवयव दान केले. तिच्या बापायन म्हणलें, ‘हीराक दोतोर जावपाची इत्सा आशिल्ली. आमी तिची कुड दान केली कारण ती दोतोर जावंक नासली तरी हांका लागून ती दुसऱ्यांचो जीव वाटावंक शकतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
