भांगरभूंय | प्रतिनिधी
मडगांव: मडगांव गुजराती समाजान तांच्या विशेश भुरग्यांच्या शाळा संकुलांत आयोजीत केल्ल्या नवरात्री सुवाळ्याक हाजीर रावन म्हाका खोस भोगली. गुजराती समाजाचें समाजकार्यांत खूब व्हड योगदान आसा अशें तरणाटे फुडारी प्रभव नायक हांणी म्हणलें.
गुजराती समाजा वतीन नवरात्रोत्सवाचे सवे रातचे कार्यावळींत उलयतना प्रभव नायक हांणी समाजाच्या सगल्या वांगड्यांक तांचे स्थापणुकेक 60 वर्सां पुराय जाल्ले खातीर शुभेत्सा दिल्यो. ह्या वेळार अध्यक्ष सोनल दोशी, उपाध्यक्ष रुषभ सावला, जोड सचीव साहील गोसालिया बी मानेस्त हाजीर आशिल्ले.
आमचे कुटूंब गुजराती समाजा कडेन लागींचें आसा. म्हजो आजो अनंत उर्फ बाबू नायक हांचे गुजराती समाज वांगड्यां कडेन बरे संबंद आशिल्ले. हें नातें अशेंच सांबाळून दवरुया आनी मडगांवां खातीर योगदान दिवया अशें प्रभव नायक हांणी म्हणलें.
मडगांवच्या गुजराती समाजाच्या उपक्रमांक हांव सगले तरेची मजत करतलों. विशेश भुरग्यां खातीर आशिल्ले शाळेक सरकारा सयत सगल्यांच्या तेंक्याची गरज आसा अशें प्रभव नायक हांणी सांगलें.
ताचे पयलीं गुजराती समाज समिती वांगड्यांनी प्रभव नायक हांकां येवकार दिलो. ‘दांडिया’ भेट दिवन समिती वतीन तांचो भोवमान केलो. प्रभव नायक हांणी महाप्रसाद घेतलो तशेंच दांडिया आनी गरबा नाचांत वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
