भांगरभूंय | प्रतिनिधी
रॉयल चॅलेंजर्स बंगळुरू आनी गुजरात टायटन्स ह्या पंगडां मदीं इंडीयन प्रिमीयर लिगेची (आयपीएल) 52वी मॅच हांगाच्या एम चिन्नास्वामी मैदानाचेर जातली. प्ले ऑफाचे दिश्टीन ही मॅच दोनूय पंगडां खातीर म्हत्वाची आसा.
अहमदाबादांत जाल्ले फाटले मॅचींत विराट कोहलीन बंगळुरूच्या जैताचें मुळावण घाल्लें. कोहलीक एम चिन्नास्वामी मैदानाचेर खेळपाक लेगीत आवडटा. कोहलीच्या मुखार गुजराताच्या एकाय बॉलराचें शाणपण चलना. पूण, राशीद खान फॉर्मांत आयलो जाल्यार मात कोहलीक सहज रितीन धांवड्यो करप मात्शें कठीण जावये.
राशीद खाना आड कोहलीची स्ट्रायक रेट 124 इतकी आसा. ताणें ताका दोन खेपे बाद लेगीत केला. साई किशोर हाच्या आड लेगीत कोहलीचें बॅट शांत उरता. साई किशोरान ताका एकदा लेगीत बाद करूंक नासलो तरी कोहलीन ताच्या आड फकत 112.5चे स्ट्रायक रेटीन धांवड्यो केल्यात. राहुल तेवतिया आड लेगीत कोहलीन फकत 34 बॉलांनी 40 धांवड्यो केल्यात.
फाटले मॅचींत गुजराताचो मुखेली शुभमन गीलाक बरी सुरवात केल्या उपरांत ताचें रुपांतर व्हड खेळूंत करपाक जमूंक नाशिल्लें. अंदूंच्या हंगामांत गुजराताच्या टॉप बॅट्समनांक धांवड्यो करपाक जमूंक ना. ही गजाल गिलाचे बॅटिंगेक प्रभावीत करता. पूण, बंगळुरू आड डॅव्हिड मिलर आनी गील हांचो रॅकॉर्ड बरो आसा.
बंगळुरू आड गिलान आनी मिलरान एकेक शेंकडो मारला. बंगळुरू आड केन विलयम्सनाक लेगीत खेळोवपाक शकता. बंगळुरू आड ताची सरासरी 50 परस चड आसा. ताणें पांच अर्द शेंकडे लेगीत मारल्यात.
बंगळुरूचो फास्ट बॉलर मोहम्मद सिराजा खातीर अंदूंचो हंगाम बरो वचूंक ना. गिला आड ताचें आंकडे लेगीत समाधानकारक नात. आयपीएलांत गिलाक बाद करपाक सिराजाक जमूंक ना. दुसरे वटेन गिलान 150चे स्ट्रायक रेटीन 179 धांवड्यो केल्यात. अल्झारी गिलाक आडावपाक शकता. अजून मेरेन दोन खेपे ते एकामेका आड खेळ्ळ्यात आनी दोनूय खेपे अल्झारीनूच गिलाक बाद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
