भांगरभूंय | प्रतिनिधी
गुजरात टायटन्सान इडन गार्डन्साचेर जाल्ले इंडियन प्रिमीयर लिगेंत (आयपीएल) काल जाल्ले पयले मॅचींत येजमान कोलकाता नायट रायडर्सा आड 7 विकेटींनी झणझणीत जैत जोडलें. सध्याचो वस्ताद गुजरात टायटन्सान जैताची हॅट्रीक करून गुणतकट्यांतली पयली सुवात मेळयली. ताचे 12 गूण जाल्यात. जाल्यार दुसरे वटेन कोलकाता नायट रायडर्साचें लिगेंतलें आव्हान लागीं लागीं सोंपिल्ल्यांत जमा जालां. ताणें णवांतली सवी मॅच वगडायली.
कोलकातान दिल्ली 180 धांवड्यांची मोख गुजरातान 17.5 ओव्हरींनी फकत 3 विकेटी वगडावन मेळयली.
ते पयलीं गुजरात टायटन्सान टॉस जिखून कोलकाता नायट रायडर्साक बॅटिंग करपाचें आमंत्रण दिलें. कोलकाता नायट रायडर्सान 20 ओव्हरींनी 7 विकेटी वगडावन 179 धांवड्यो केल्यो. रहमानउल्ला गुरबाजान 39 बॉलांनी 81 धांवड्यांची आक्रमक बॅटींग करून कोलकाताची धांवसंख्या 200च्या लागसार व्हेली. ते उपरांत बर्थ डे बॉय आंद्रे रसेलान 19 बॉलांनी 34 धांवड्यांचो पावस घालो. मोहम्मद शमीन 3, जोश लिटल आनी नूर अहमद हांणी दरेकी 2 विकेटी घेतल्यो.
मोखीचो फाटलाव करपी गुजरात टायटन्सान जबरदस्त सुरवात केली. पूण, आंद्रे रसेलान कोलकाताक पयलें येस मेळोवन दिलें. ताणें वृद्धिमान साहाक (10) बाद केलो. तो बाद जालो त्या वेळार गुजरातान 49 धांवड्यो केल्ल्यो. ते उपरांत मुखेली हार्दिक पांड्या आनी शुभमन हांणी अर्द शेंकड्याची भागिदारी करून कोलकाताचे टॅन्शन वाडयलें. पूण, हर्षित राणान ही जोडी फोडटना हार्दिकाक (26) बाद केलो. शुभमन गिलान आपलो फॉर्म कायम राखतना 35 बॉलांनी आठ चवक्यांचे मजतीन 49 धांवड्यो केल्यो.
विजय शंकर आनी डॅव्हिड मिलर हांणी चवथे विकेटी खातीर 50+ धांवड्यांची भागिदारी करून कोलकाताची हार निश्चीत केली. विजय शंकरान 24 बॉलांनी पांच सके आनी दोन चवक्यांचे मजतीन नाबाद 51 धांवड्यांची खेळी केली. डॅव्हिड मिलरान 18 बॉलांनी 32 धांवड्यांचें योगदान दिलें.
गुजरात टायटन्सान 17.5 ओव्हरींनी 3 विकेटी वगडावन 180 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
