भांगरभूंय | प्रतिनिधी
निकोलस पुरन (61) आनी एडेन मार्करम (58) हांच्या अर्द शेंकड्यां नेटार इंडियन प्रिमियर लिगेचे (आयपीएल) अंदूंच्या हंगामांतले 26वे मॅचींत ऋषभ पंताच्या फुडारपणाखाला खेळपी लखनौ सुपर जायण्ट्सान घरच्या मैदानाचेर खेळटना गुजरात टायटन्साक 6 विकेटींनी हारयलो. पयलीं बॅटींग करपी गुजरात टायटन्सान शुभमन गिल (60) आनी साई सुदर्शन (56) हांणी नोंदयिल्ल्या अर्द शेंकड्यांच्या नेटार निर्धारीत 20 ओव्हरींनी 6 विकेटी व्हगडावन 180 धांवड्यो केल्यो. हे धांवसंख्येचो फाटलाव करतना लखनौ सुपर जायण्ट्सान 19.3 ओव्हरींनी 4 विकेटी व्हगडावन 186 धांवड्यो करून जैत जोडलें.
गुजराताच्या गिल आनी सुदर्शन हे जोडयेन पयले विकेटी खातीर 120 धांवड्यांची भागिदारी केल्ली. अंदूंच्या हंगामांत ओपनराचे जोडयेन केल्ली ही सर्वोच्च भागिदारी थारली. हे जोडयेन 73 बॉलांनी 120 धांवड्यो केल्ल्यो. हे दोगूय तंबूंत परतून गेल्या उपरांत गुजरात टायटन्साचें गणीत इबाडलें. उरिल्ल्या 47 बॉलांनी पंगडान फकत 60 धांवड्यो केल्यो. 12वे ओव्हरी उपरांत लखनौ सुपर जायण्ट्साच्या बॉलरांनी नवीन ट्विस्ट हाडून जो पंगड सहज 200चो आंकडो उबारतलो अशें दिशिल्लें, ताका फकत 180चेर आडायलो.
आवेश खानान गिल आनी सुदर्शन हांची जोडी फोडली. ते उपरांत रबी बिश्नोईन एकेच ओव्हरींत गुजराताक दोन धपके दिले. साई 37 बॉलांनी सात चवके आनी एक सक्याचे मजतीन 56 धांवड्यो करून कॅच बाद जालो. ताच्या फाटोफाट वॉशिंग्टन सुंदर (2) तेच ओव्हरींत तंबूंत परतलो. दिग्वेश राठीन जोस बटलराक (16) शांत दवरलो. शेरफान रुथरफोर्डाची कॅच पंतान सोडली. हाचो फायदो घेत ताणें 22 धांवड्यो केल्यो. शार्दुल ठाकूरान 20वे ओव्हरींत ताका बाद केलो. राहुल तेवातियाक (0) पयल्याच बॉलाचेर बाद करून शार्दुलान दुसरे खेपे हॅट्रिकेची संद तयार केली. पूण, ताका दोनूय खेपे हॅट्रिकेन हुलकावणी दिली. गुजरातान 6 बाद 180 धांवड्यो केल्यो.
लखनौ सुपर जायण्ट्सा वतीन रवी बिश्नोई आनी शार्दुल ठाकूर हांणी दरेकी 2 विकेटी घेतल्यो. ताचे खेरीत आवेश खान आनी दिग्वेश राठी हांकां एकेक विकेट फावो जाली.
मिचेल मार्शचे गैहराजेरेंत मुखेली ऋषभ पंतान लखनौच्या डावाची सुरवात केली. पंगडाच्या धांवतकट्याचेर 65 धांवड्यो लागना फुडें पंत 18 बॉलांनी 21 धांवड्यो करून बाद जालो. ओपनराचो प्रयोग तसो पळोवपाक गेल्यार फसलोच. पूण, एडेन मार्करम आनी निकोलस पुरन हांणी केल्ले जबरदस्त खेळीक लागून लखनौक बेगीन विकेट पडिल्ल्याचो तसो व्हडलो त्रास जालो ना.
मार्करमान 31 बॉलांनी 9 चवके आनी एका सक्याचे मजतीन 58 धांवड्यो केल्यो. निकोलस पुरनान परतून एकदा आपली आक्रमक शैली दाखोवन दिली. ताणें 34 बॉलांनी 1 चवको आनी सा सक्यांचे मजतीन 61 धांवड्यो करून जैत लागींलागीं निश्चीत केलें. साई किशोरान घाल्ले 10वे ओव्हरींत ताणें 6,1,4,1,6,6 अशो 24 धांवड्यो केल्यो. लखनौन 10 ओव्हरींनी 1 बाद 114 धांवड्यो केल्यो. मार्करमान अंदूंच्या हंगामांतलो दुसरो अर्द शेंकडो पुर्ण केलो.
30 बॉलांनी 27 धांवड्यांची गरज आसतना वॉशिंग्टन सुंदरान आयुष बदोणीची सोंपी कॅच सोडली आनी गुजराताक पुनरागमन करपाची संद व्हगडायली अशें दिसलें. पूण, फुडलेच ओव्हरींत राशिद खानान लखनौच्या पुरनाची विकेट घेतली. जैता खातीर सात धांवड्यांची गरज आसतना वॉशिंग्टन सुंदरान डॅव्हिड मिलराक बोल्ड केलो.
आयुष बडोनीन अखेरचे ओव्हरींत सको मारून मॅच सोंपयली. ताणें 20 बॉलांनी नाबाद 28 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
