भांगरभूंय | प्रतिनिधी
वडोदरा, खबरां संस्था: गुजरातच्या वडोदरा शारांतल्या भैली भागांत शुक्रारा रातीं नेण्टे चलयेचेर जाल्ल्या सामुहीक बलात्कार प्रकरणां पुलिसांनी तीग आरोप्यां सयत ५ जाणांक अटक केल्या. आरोपींक धरपा खातीर वडोदरा गुन्यांव फांट्यान १००० परस चड सीसीटीव्ही कॅमेर्यांच्या ७० हजारां परस चड फुटेजींचें विश्लेशण केलें. घडणुके सुवातेर सांपडिल्लें वक्ल आनी फोन कॉल तपासून दुबावितांचो सोद घेतलो.
हे तिगूनय मुळचे उत्तर प्रदेशचे. ते वडोदराच्या तांदलजा भागात कांय वर्सां सावन रावताले. मुन्ना अब्बास बंजारा (२७), मुमताज उर्फ आफताब सुभेदार बंजारा (३६) आनी शाहरुख किस्मत अली बंजारा (२६) अशी तांचीं नांवां. पुलिसांनी दिल्ले म्हायती प्रमाण, सामुहीक बलात्काराचे घडणुके उपरांत तांणी पिडेस्ताचो मोबायल फोनूय वांगडा व्हेल्लो. पिडेस्ताच्या कुटुंबीयांनी फोन केलो तेन्ना आरोपीन फोन घेतलो. मात तो उलोवंक ना. ह्या वेळार घरांतल्या वांगड्यांक गरब्यांत ढोल-ताशांचो आवाज आयकूंक आयलो. ह्या काळांत मोबायल ७ सेकंद चालू उरलो. मोबायलाचें लोकेशन अकोटा हांगा आशिल्लें. उपरांत आरोपींनी फोन बंद करून तो भायर मारलो.
घडणुके विशीं
यत्ता ११ वेक शिकपी १६ वर्सां पिरायेची नेण्टी चली रातच्या सुमार ११.३० वरांचेर भैली वठारांत रस्त्या कुशीक आपल्या इश्टा वांगडा बशिल्ली. मजगतीं, थंय दोन दुचाकीं वयल्यान ५ तरणाटे आयले आनी विचारपाक लागले, तुमी हांगा कितें करतात? ते चलयेन आनी ताच्या इश्टान म्हणलें, आमी हांगा बसून उलयतात. उपरांत आरोपीन नेण्ट्या चल्या कडल्यान मोबायल काडून घेतलो आनी म्हणलें, तुज्या बापायचो नंबर दी. त्या दोगांयनी आरोपीं कडल्यान मोबायल घेवपाो यत्न केलो तेन्ना तांचे हात धरले. हाचेर हेर दोग तरणाटे गुजराती भाशेंत म्हणपाक लागलें, चला, तांकां घरा वचपाक दियात, अशें म्हणून ते दोगूय थंयच्यान गेले.
मात, उरिल्ल्या तिगां तरणाट्यांनी चलयेच्या इश्टाक घट्ट धरलो आनी हेर दोगांनी ते नेण्ट चलयेचेर बलात्कार केलो. उपरांत तिसर्या आरोपीनूय चलयेचो विनयभंग केलो आनी ते तिगूय चलयेचो मोबायल घेवन घडणुके सुवाते वयल्यान पळून गेले. हे घडणुकेच म्हायती पिडेस्तान आपल्या इश्टाच्या मोबायला वेल्यान पुलिसांक दिली.
आरोपींचो सोद घेवपा खातीर जिल्लो पुलिसांचे पांच पंगड तैनात केल्ले. हे घडणुकेचो नवरात्रीच्या गरब्या कडेन संबंद ना. पिडेस्त चली सुमार १०.३० ते ११.४५ वरांचेर घरांतल्यान भायर आशिल्ली. रातच्या ११ वरांचेर लक्ष्मीपुरा वाठारांत ती तिच्या इश्टाक मेळ्ळी. उपरांत तीं दोगांय काळोख आशिल्ल्या वाठारांत बशिल्लीं. रातच्या सुमार १२ ते १ चे मजगतीं सामुहीक बलात्काराची घडणूक घडली.
पिडेस्त तरणाटी आनी तिचो इश्ट आरोपींचें तोंड वळखुपाक शकलीं नात. दोग जाण गुजराती आनी तीग हिंदींत उलयताले, अशें तांणी सांगलें. हाच्या आदारार पुलिसांनी आरोपींक धरले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
