भांगरभूंय | प्रतिनिधी
अहमदाबाद, खबरां संस्था ः अहमदाबाद जिल्ह्यांतल्या ढोलेरा हांगा जाल्ल्या ठाकरधाम प्राण प्रतिष्ठा महोत्सवा वेळार भरवड समुदायाच्या 75 हजार चलयांनी पारंपारीक भेसांत सामुहीक हुडो रास नाच सादर केलो. एकाच समाजांतल्या आनी एकाच सुवातेर सादर केल्ल्या गट नाचा खातीर तांचें नांव गिनीज बुक ऑफ वर्ल्ड रेकॉर्डांत नोंद जालां.
अहमदाबाद लागसारच्या ढोलेरा तहसीलांतल्या बावनियानी हांगा आशिल्ले संत श्री नागलखा बापाचे ठाकरधाम हे भरवड समाजा खातीर श्रद्धेचे थळ. ह्या वेळार ठाकरधामांत एकाच वेळार चार विक्रम जाल्यात. पयलो म्हळ्यार सामुहीक हुडो नाच, दुसरो 111 फूट लांब उजवात लायली, तिसरो 10,000 लोकांची सामुहीक मिरवणूक आनी चवथो 22 फूट बांसरी.
प्रधानमंत्री नरेंद्र मोदी हे कार्यावळीक व्हर्च्युअल पद्दतीन वांटेकार जाल्लें. तेच बरोबर गुजरातचे मुख्यमंत्री भूपेंद्र पटेल हाजीर आशिल्लें. प्रधानमंत्री नरेंद्र मोदी हांणी व्हर्च्युअल पद्दतीन भरवाड समाजाक संबोधन केलें. ‘एक पेड माँ के नाम’ मोहिमे खाला सैमीक शेती आपणावन झाडां लावचें अशें भरवाड समाजाक प्रधानमंत्र्यांनी उलो केलो. मुखेलपणान पशुपालनांत वांटो घेवपी समाजाक 2047 मेरेन भारताक विकसीत राष्ट्र करपाक योगदान दिवचें अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
