भांगरभूंय | प्रतिनिधी
अहमदाबाद, खबरां संस्था ः आतां मेरेन मेळिल्ल्या सगळ्यांत लांब सोरपाचे अवशेश गुजरातांतल्या कच्छ जिल्ह्यांत मेळ्ळ्यात. ह्या सोरपाच्या जातीचें नांव वासुकी इंडिकस अशें आसा. आयआयटी- रुरकी हांगाच्या शास्त्रज्ञांनी ताचो सोद लायलो आनी हालीं हो महाकाय सोरोप आशिल्ल्याची खात्री जाल्या.
संशोधकांनी सोरपाचे फाटीचे 27 हाडांचो सोद लायलो. हो संशोधन अहवाल हालींच ‘सायंटिफिक रिपोर्ट्स’ ह्या नेमाळ्यांत उजवाडाक आयला.
शंकराच्या गळ्यांत गुठलायल्ल्या नागाचेंय नांव आनी अमृतमंथना वेळार वापरिल्ल्या नागाचें नांव ‘वासुकी’. ताका सोरपांचो राजा म्हण्टाले. त्याच वेळार ‘इंडिकस’ ह्या उतराचो अर्थ ‘भारताचे’ असो जाता. शास्त्रज्ञांच्या मतान हो सोरोप फकत भारतांतच मेळ्ळो. आतां नामशेश जाल्लो हो सोरोप संवसारांतल्या सगळ्यांत लांब सोरोपांतलो एक आशिल्लो. आयचे अॅनाकोंडा पसून ताचे मुखार सामकेच ल्हान आशिल्ले.
वासुकी नागाची लांबाय 11-15 मीटर (सुमार 50 फूट) आसून ताचें वजन 1 टन (1000 किग्रॅ.) आशिल्लें. इंडिकस हो आतां नामशेश जाल्ल्या मॅडसोइडे कुटुंबाचो एक भाग आसा जो आफ्रिका, युरोप, भारत सारक्या विंगड विंगड भूगोलांत रावतालो. हो सोरोप 5 ते 6 कोटी वर्सां आदीं मेळिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
