भांगरभूंय | प्रतिनिधी
अहमदाबाद, खबरां संस्थाः गुजरात पुलिसांनी गांधीनगर वाठारांतल्या बनावट न्यायालयाचीं फटींगपणां उक्ताडार हाडलीं. हे कारवायेंत पुलिसांनी २०१९ वर्सा सावन चालू आशिल्ली कट येवजण उक्ती केल्या. ह्या प्रकरणांत पुलिसांनी मॉरिस सॅम्युअल ख्रिश्चन नांवाच्या मनशाक अटक केल्या.
पुलिसांनी दिल्ले म्हायती प्रमाण, मॉरिस ख्रिश्चन स्वता न्यायाधीश आशिल्ल्याचें भासोवन फटींग लवादा वरवीं विशेश म्हळ्यार जमीन वेव्हारांच्या खटल्यांचो निवाडो करतालो. ताका लागून तांणी बनावट न्यायालयूय अशे तरेन उबारलें, जशें तें पक्षकारांकूय खरें कशें दिसलें. अशे तरेन तांणी जायत्या जाणांक फटयिल्लीं.
चवकशेंत अशें दिसून आयलें, ख्रिश्चन जमनीच्या वादांत आडकल्ल्या दुबावीतांचेर नदर दवरून आशिल्लो. उपरांत भरपूर शुल्काच्या बदलाक तांचे खटले बेगीनूच निकालांत हाडपाचें आस्वासन दितालो. अशे तरेन तांणी अशिलांचे वटेन जायते निकाल दिल्ले. ख्रिश्चनान सगळ्यांत पयलीं २०१९त जिल्होधिकार्यांच्या अधिकारक्षेत्रांतल्या सरकारी जमिनीच्या खटल्यांचो निकाल दिलो. तातूंत अशिलान संबंदीत जमनीच्या उतार्याचेर आपलें नांव लावपाक खटलो दाखल केल्लो अशी म्हायती पुलिसांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
