भांगरभूंय | प्रतिनिधी
गांधीनगर, खबरां संस्था: संवसारांत वेगवेगळे व्हायरस धुमशेणां घालीत आसात. कोरोनाच्या वेगवेगळ्या व्हेरियंटाक लागून जाल्ल्या विध्वंसा उपरांत आतां आफ्रिकन देशांनी मंकीपॉक्स धुमशेणां घालतना दिसता. इतलेंच न्हय तर सध्या हो व्हायरस शेजारचो देश पाकिस्तानांत पावला. अशें आसतना गुजरातांत ‘चांदीपुरा’ हो व्हायरस पावला, अशी म्हायती भलायकी मंत्री हृषिकेश पटेल हांणी सभाघरांत दिली.
गुजरातांत आतां मेरेन व्हायरल एन्सेफलायटीसचीं १६४ प्रकरणां सांपडल्यांत. हातूंत १०१ भुरग्यांक संसर्गाक लागून मरण आयलां. आतां मेरेन मेळिल्ल्या ह्या १६४ दुयेंतीं मदले ६१ दुयेंती चांदीपुरा व्हायरसाक लागून जाल्यात.
चांदीपुरा व्हायरसाचीं लक्षणां कितें?
चांदीपुरा व्हायरसाचीं लक्षणां फ्लू सारकीं आसतात. ताका लागून एन्सेफलायटीस (मेंदवांत गरगरप) जाता. जळारां आनी मूस हांचे वरवीं ताचो प्रसार जाता. पटेल हांणी म्हणलें, ‘आतां मेरेन १४ वर्सां सकयल्या १०१ भुरग्यांक खर एन्सेफलायटीसाक लागून मरण आयलां. तातूंतल्या २८ जाणांक चांदीपुरा व्हायरसाच्या संसर्गाक लागून मरण आयलें, जाल्यार हेर ७३ जाणांक व्हायरल इन्फेक्शनाक लागून जावपी एन्सेफलायटीसाक लागून मरण आयलां.
६३ भुरग्यांक उपचारा उपरांत घरा सोडले
६३ भुरग्यांक उपचारा उपरांत घरा सोडले, जाल्यार चार भुरग्यांचेर आजूनय वैजकी उपचार सुरू आसात अशें मंत्री हांणी सांगलें. परिस्थिती नियंत्रणांत आसा आनी फाटल्या एका सप्तकांत नवे दुयेंती मेळूंक नात. फाटल्या १२ दिसांनी कोणाक मरण येवंक ना. मंत्रीमंडळाच्या म्हणण्या प्रमाण सरकारान चांदीपुरा व्हायरसाचेर वाहक नियंत्रण आनी आळाबंदा हाडपा खातीर राज्यभर मोहीम सुरू केल्या.
हे मोहिमे खाला भलायकी पंगडांनी ज्या वाठारांनी व्हायरल एन्सेफलायटीस आनी चांदीपुराचे दुयेंती मेळ्ळे थंयच्या ५३ हजारां परस चड घरांचें सर्वेक्षण केलें. तांणी म्हणलें, रोगाच्या नियंत्रणा खातीर गांवांतल्या ७ लाखां परस चड मातयेच्या घरांनी मॅलेथिऑन पावडराचो फवारो मारला. सुमार १.५८ लाख घरांमध्ये द्रव किटकनाशक किटकनाशक वखदाचो फवारो मारला.
पिडेस्त जिल्ह्यांतल्या सुमार ४० हजार शाळांनी आनी ३६ हजारां परस चड बालवाड्यांचेर मलाथिओन पावडर आनी द्रव किटकनाशकाचो फवारो मारलो. गांधीनगर हांगच्या गुजरात बायोटेक्नॉलॉजी रिसर्च सेंटर चांदीपुरा सोडून हेर विशाणू वळखपा खातीर संशोधन करता, अशें पटेल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
