भांगरभूंय | प्रतिनिधी
कफ सिरप तयार करपाचेर घाली बंदी
गुजरात, खबरां संस्था ः गुजरातांतले वखदां तयार करपी कंपनीक कफ सिरप तयार करपाचेर बंदी घाल्या. ह्या कफ सिरपांत धोक्याचीं रसायनां आसतात आनी ताका लागून कुडीक त्रास जाता, असो आरोप आसा. गुजरातांतल्या अन्न आनी वखदां नियंत्रण खात्यान कफ सिरप उत्पादन बंद करपाचे आदेश जारी केल्यात. वखदां कंपनी नॉरिस मेडिसीन्स लिमिटेडची चवकशी सुरू केल्या अशें विभागीय प्रशासकीय आयुक्त एचजी कोसिया हांणी सांगलें. चांचण्यांनी ह्या कफ सिरपांत धोक्याचीं रसायनां आशिल्ल्याचें स्पश्ट जाले.
अशे परिस्थितींत कंपनीक वखदाचें उत्पादन बंद करून सिरप बाजारांतल्यान फाटीं घेवपाचो आदेश दिला. तपासांत वखदां तयार करपा संबंदी सरकारान थारायिल्ले नेम कंपनीन योग्य रितीन पाळूंक नाशिल्ल्याचें दिसून आयलें. देखून हो निर्णय घेतला.
वखदां तयार करपा खातीर बऱ्यो उत्पादन पद्दती पाळनात, अश्यो जायत्यो वखदां कंपनीं आसात अशें रोगजंतूशास्त्रज्ञ सांगतात. देखून वखदां थारायिल्ल्या मानकांप्रमाण तयार करिनात. कांय प्रकरणांनी वखद योग्य आसता, पूण ताच्या ओव्हरडोजाक लागून ताचे दुश्परिणाम जातात.
फाटल्या कांय म्हयन्यांत कफ सिरपच्या दुश्परिणामाच्या बाबतींत वखदांचो ओव्हरडोज हें एक मुखेल कारण आसूं येता. ओव्हरडोजाक लागून मूत्रपिंडाची लागण, पोट दुखप सारकिल्ले त्रास जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
