भांगरभूंय | प्रतिनिधी
गुवाहाटी, खबरां संस्था: गुगल मॅपाक लागून जायते रस्ते आमकां समजतात. मॅपाचो वापर करुन अनवळखी सुवातांचेर नवो मनीस सहज वचपाक शकता. गुगल मॅप फकत मार्गूच दाखयना, येरादारीचीय म्हायती दिता. मात, गुगल मॅपान चुकीचो मार्ग दाखयिल्ल्यान अपघाताच्यो जायत्यो घडणुको घडिल्ल्याचेंय पळोवपाक मेळ्ळां. जायते फावट गुगल मॅप चुकीच्या सुवतांचेरूय व्हरता. असोच एक प्रकार आसामाच्या पुलिसां वांगडा घडला.
नेमकें कितें घडलें?
आसामच्या पुलिसांचो १६ जाणांचो पंगड छापो घालपा खातीर एके सुवातीर वतालो. मात, गुगल मॅपान चुकीचो मार्ग दाखयिल्ल्यान पुलीस भलतेच कडेन पावले. जालें अशें, आसाम पुलिसांचो १६ जाणांचो पंगड एका आरोपीक धरपा खातीर वतालो. छापो घालपा खातीर पुलीस भायर सरले. तांणी वतना गुगल मॅपाचो वापर केलो. तेन्ना गुगल मॅपान चुकीचो मार्ग दाखयलो आनी आसामांतल्यान पुलीस सरळ नागालँडांत पावले.
नागालँडच्या मोकोकचुंग जिल्ह्यांत मंगळारा रातीं ही घडणूक घडली. आसामाचे पुलीस चुकीचे सुवातेर पावतकच थळाव्यांनी तांचेर दरोडो घालपाक आयिल्ल्याचें समजून हल्लो केलो. पुलीस छापो घालपाक गेल्ल्यान ते साद्या भेसांत वताले. मात तांतले तीग जाण गणभेसांत आशिल्ले. थळाव्यांनी तांकां गुन्यांवकार समजून तांचेर हल्लो केलो आनी तांकां रातभर कैद केले.
मजगतीं, हे पुराय घडणुकेची म्हायती नागालँड पुलिसांक मेळ्ळी आनी पुलिसांची सुटका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
