भांगरभूंय | प्रतिनिधी
भारताचो ग्रॅण्डमास्टर डी गुकेशाक कॅण्डिडेट्स बुद्दीबळ सर्तीचे सातवे फेरयेंत फ्रान्साच्या अलिरेझा फिरौझा कडल्यान हार घेवची पडली. हे हारीक लागून गुणतकट्यांतली जोड रितीन मेळयिल्ली पयली सुवात ताका व्हगडावपाची पडली. दुसरे वटेन रशियेच्या इयान नेपोम्नियाशीन अमेरिकेच्या हिकारू नाकामुराक बरोबरींत आडावन 4.5 गुणां सयत आघाडी मेळयली. उक्त्या गटांत हेर भारतीय खेळगडे आर प्रज्ञानंद आनी विदीत गुजराथी हांकां हे फेरयेंत बरोबरीचेर समाधान मानचें पडलें.
सातवे फेरये आदीं गुकेश आनी नेपोम्नियाशी हांचे दरेकी चार गूण आशिल्ले. नेपोम्नियाशी आनी नाकामुरा हांचो डाव बरोबरींत सुटिल्ल्यान, गुकेशा कडेन जैत जोडून गुणतकट्यां एकोडे रितीन पयली सुवात मेळोवपाची संद आशिल्ली. पूण, ताका ताचो फायदो घेवपाक जमलो ना. वेळ उणो आशिल्ल्यान गुकेशाक खोलायेन विचार करून चाली रचपाक ताकतीक करची पडली आनी ताच्या कडल्यान चुकी घडल्यो. ताका लागून गुकेशाक सर्तीतले पयले हारीक तोंड दिवचें पडलें.
दुसरे वटेन प्रज्ञानंदान अमेरिकेच्या फॅबिआनो कारुआनाक बरोबरींत आडायलो. विदीथान अझरबैजानाच्या निजात अबासोवा आड बरोबरींत समाधान मानलें.
अबासोबाक सर्तींत सकल्यांत निमाणें मानांकन दिलां. फाटल्या दोन फेरयांनी ताका गुकेश आनी प्रज्ञानंद हांच्या कडल्यान हार घेवची पडिल्ली. ताका लागून फकत बरोबरीची नोंद करप विदीता खातीर निर्शेणी हाडपी निकाल थारलो.
सातवे फेरये उपरांत नेपोम्नियाशीन आपली पयली सुवात घटमूट केली. गुकेश, प्रज्ञानंद आनी कारुआना हांचे दरेकी चार गूण जाल्यात आनी ते जोड रितीन दुसरे सुवातेर आसात. विदीत आनी नाकामुरा हे दरेकी 3.5 गुणां सयत जोड रितीन पांचवे सुवातेर आसात. फिरौझा 2.5 गुणां सयत सातवे, जाल्यार अबासोव दोन गुणां सयत आठवे सुवातेर आसा.
सर्तींत सात फेरयो जाल्यात आनी सात फेरयो बाकी आसात. आठवी फेरी सुरू जावचे पयलीं खेळगड्यांक एक दिसाचो विसव मेळटलो.
बायलांच्या गटांत आर वैशालीक कामगिरींत सुदारणां करपाक परतून अपेस आयलें. सर्तींत तिका वट्ट तिसरी आनी सेगीत दुसरी हार घेवची पडली. चीनाचे ले टिंगजीन वैशालीक हारयली. तशेंच कोनेरू हम्पीची पयल्या जैताची प्रतिक्षा कायम उरली. तिका अॅना मुझिचुकान बरोबरींत आडायली. ह्या निकाला उपरांत बायलांच्या गटांत भारताचें आव्हान लागीं लागीं सोंपलां. चीनाची टॅन झोंगी पांच गुणां सयत पयले सुवातेर आसा. दुसरे सुवातेर आशिल्ले अलेक्झांड्रा गोर्याचकीनाचे 4.5 गूण आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
