गुंतागुंतीचो प्रस्न सुटत जाल्यारूच पेडणेंकारांक म्हजें घर येवजणेचो फायदो

भांगरभूंय | प्रतिनिधी

राजन कोरगांवकारः थोड्याच लोकांक मेळटलो येवजणेचो फायदो

पेडणें: फाटल्या कितल्याशाच पिळग्यां सावन पेडणेंचे मूळ गोंयकार आपल्या घरांची मालकी घेवपा खातीर खटपट करीत आसात. भटकार गांवकारांच्या जमनीचेर मुंडकारांचीं घरां, देवळां आनी इगर्ज संस्थांचे जमनीचेर घरां, तशेंच वजरी-पेडणें, धारगळ ह्या सारक्या सुवातींनी कोर्ट रिसीव्हरांच्या नांवान रावपी लोकांचीं घरां, हो पोरनो आनी गुंतागुंतीचो प्रस्न आयज लेगीत अनुत्तरीत आसा. ह्या प्रस्नांक योग्य जाप मेळ्ळी जाल्यारूच पेडणेंकारांक म्हजें घर येवजणेचो खरो फायदो मेळटलो अशें मिशन फॉर लोकल, पेडणेंचे संस्थापक राजन कोरगांवकार हांणी मुख्यमंत्री डॉ. प्रमोद सावंत हांकां सादर केल्ल्या निवेदनांत म्हणलां.

म्हजें घर येवजणे खातीर अर्ज वांटपाची कार्यावळ आयतारा पेडणें आनी मांद्रें हांगा आयोजीत केल्ली. ह्या कार्यावळीच्या निमतान कोरगांवकारान मुख्यमंत्री सावंत हांचे कडेन निवेदन सादर केलें.

सगली कडेन हे येवजणेक येवकार मेळटा तरी खऱ्या भूंय पुताक न्याय मेळप गरजेचें आसा. पेडणेंकार हो कायद्याक पाळो दिवपी नागरीक. देखून सरकारी आनी कोमुनिदादीचे जमनीचेर अतिक्रमणांचो प्रस्न पेडणें नगण्य आसा. फक्त थोड्याच लोकांक 1972 वर्साच्या कायद्याचो फायदो मेळटलो. पूण जायत्या पिळग्यां सावन भटकार आनी गांवकारांच्या जमनीचेर रावपी, मुंडकार कायद्या खाला अर्ज करपी, तशेंच देवळां आनी इगर्ज संस्थांचे जमनी वेलीं शेंकड्यांनी घरां मालकी हक्का पसून वंचित आसात अशें कोरगांवकार हांणी म्हणलें.

वजरी आनी धारगळ गांवांतलो कोर्ट रिसीव्हरांचो प्रस्न कितल्याशाच पिळग्यां सावन प्रलंबीत आसा. थंय लोकांचीं घरां आनी जमनीय आडकून पडल्यात. हाचे भायर कांय नागरिकांनी आपल्या खाजगी जमनीचेर घरां बांदून तीं नियमित करपा खातीर अर्ज केल्यात, पूण तांकां अजून न्याय मेळूंक ना अशें कोरगांवकार हांणी स्पश्ट केलें.