भांगरभूंय | प्रतिनिधी
विमा सखी येवजणे वरवीं एलआयसी एजंट जावपाची संद
पणजी : विमा वा हेर गुंतवणुकेच्या मळार प्रामाणीक लोकांनी येवप गरजेचें आशिल्ल्याचें मत मुख्यमंत्री डॉ. प्रमोद सावंत हांणी उक्तायलें. मंगळारा पणजे विमा सखी कार्यावळीच्या उक्तावणा वेळार ते उलयताले. ह्या वेळार सांख्यिकी संचालक विजय सक्सेना, जिल्हा ग्रामीण विकास यंत्रणेचे गोपाळ पार्सेकार, दीपाली नायक, भारतीय आयुर्विमा महांडळाची (एलआयसी) मंडळ अधिकारी संगीता परब आनी हेर अधिकारी हजर आशिल्ले.
राज्यांत विमा वा गुंतवणूक मळार बरे लोक येनात. हाचोच फायदो घेवन राज्यांत फटींग गुंतवणूकदार वाडल्यात. असले लोक बर्या परताव्याचें आस्वासन दिवन लोकां कडल्यान म्हयन्याक ५०० ते १००० रुपया एकठांय करतात. मात जायत्या प्रकरणांत गुंतवणूक केल्ले पयशे परत दिवंक ना, अश्या फटींगांचेर सध्या कशी सुरू आसात. हांव कोणाचेंच नांव घेवचो ना. कारण अशें केल्यार त्या कंपनींचीं नांवां जाहीर जातलीं. मात एलआयसी सारकिल्ल्या फाटल्या ६८ वर्सां काम करपी संस्थेंत पयशे गुंतोवपाचे. हे संस्थेंत पयशे गुंतयल्यार वा विमो केल्यार तुमकां पावती दितात.
विमा सखी जावपा खातीर उण्यांत उणी शिक्षणीक पात्रताय धावी पास आसा. विमा सखी जावपा खातीर एक परिक्षा दिवची पडटली. पास जावपी बायलांक हे येवजणे खाला प्रशिक्षण दितले. हाका लागून ११ म्हालांनी तशी वेवस्थाय करतले. हाचे उपरांत तांका एलआयसी एजंट म्हणून काम करपाची संद मेळटली. ह्या बायलांक फकत दुसरे व्यक्तीक विम्याचें म्हत्त्व समजावन सांगपाक कळपाक जाय. एका वर्सान २४ पॉलिसी केल्यार बोनस जिखतले अशेंय मुख्यमंत्र्यान सांगलें.
प्रधानमंत्री नरेंद्र मोदीं हांणी डिसेंबर २०२४त विमा सखी येवजण सुरू केल्ली. उपरांत राज्य पांवड्यार अशी येवजण सुरू करपी गोंय देशांतलें पयलें राज्य थारलां. ते प्रमाण बायलांक पयल्या वर्सा प्रती म्हयनो ७ हजार, जाल्यार दुसर्या वर्सा प्रती म्हयनो ६ रुपया दितले. तशेंच बोनस म्हणून ४८ हजार रुपयां मेरेन मजत दितले.
१७ हजार लखपती दीदींची मोख
प्रधानमंत्री नरेंद्र मोदी बायलां सबलीकरणा खातीर बांदील आसात. तांचो बायलांचेर विस्वास आसा. हाचे खातीरूच तांणी बायलां खातीर जायत्यो गरजेच्यो येवजण्यो सुरू केल्यात. आमच्या राज्यांत १ हजार विमा सखी तशेंच १७ हजार लखपती दीदी तयार करपाची मोख आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
