भांगरभूंय | प्रतिनिधी
भांगरभूंय । प्रतिनिधी
पणजीः गोंयांतल्या सुमार एक हजार गुंतवणुकदारांची चड कळंतर दिवपाचें हांयस दाखोवन तांची 7 कोटी रुपयांची फटवणूक करपी कर्मभूमी इन्फ्राटॅक रिअॅलिटीचो चॅरमन देवेंद्र पाल सिंग आनी हेर दुबावितां आड अर्थीक गुन्यांव विभागान गुन्यांव दाखल केला. कर्मभूमीचो वेवस्थापकीय संचालक मनोजकुमार सैगर हाका उत्तर प्रदेशांतल्या मथुरा हांगच्यान अटक करून गोंयांत हाडल्या उपरांत पणजेच्या उत्तर गोंय जिल्हो आनी सत्र न्यायालयान ताका 14 दीस पुलीस कादय दिल्या.
आर्थीक गुन्यांव विभागाचे उपनिरीक्षक पराग पारेख हाणे फाटल्या 20 जानेवारीक दुबावितां आड अर्थीक फटवणुकेचे गुन्यांव दाखल केल्ले. कर्मभूमी रिअॅलिटी कंपनीन 2013 वर्सा फोंड्या आनी 2018 वर्सा म्हापश्यां कार्यालय सुरू केल्ले. ताणी तांच्या रेग्युलर इंस्टॉलमेंट प्लॅन (आरआयपी) आनी सिंगल इंस्टॉलमेंट प्लॅन (एसआयपी) ह्या येजण्यात चड कळंतर दिवपाचें हांसय दाखोवन गुंतवणूक करपाक लायली. सुमार 7 कोटी रुपयांची गुंतवणूक केल्ल्या लोकांक 2019 वर्सा 10 कोटी रुपये मेळपाचे आशिल्ले. मात दोनूय कार्यालयां बंद करून कंपनीच्या अधिकाऱ्यांनी फुज्ज्यो काडलो. फटवणूक जाल्ल्याचें कळून येतगीर गुंतवणूक केल्ल्यांनी अर्थीग गुन्यांव विभागांत कागाळी नोंद केल्यो. विभागान कर्ममूमीचो चॅरमन देवेंद्र पाल सिंग, मनोजकुमार सैगर आनी क्षेत्रीय वेवस्थापक नीलेश सुर्वे हांच्या आड भारतीय दंड संहितेच्या 406, 420, आरडब्ल्यू 34 आनी गोंयच्या गुंतवणुकदार हितराखण कायद्याच्या कलम 3 आनी 5 खाला गुन्यांव नोंद केलो.
चवकशे वेळार मनोजकुमार सैगर मथुरा हांगा आशिल्ल्याची म्हायती पुलिसांक मेळ्ळी. पुलीस अधिक्षक सुनीता सावंत, उपअधिक्षक फ्रान्सिस कोर्त आनी निरीक्षक रमेश शिरोडकार हांच्या सुचोवणे वयल्यान उपनिरीक्षक पराग पारेख, हवालदार दशरथ वायंगणकारा, कॉन्स्टेबल दिनेश सावंत ह्या पथकान फाटल्या 16 एप्रिलाक मथुरेंत वचून 19 एप्रिलाक मनोज कुमाराक ताब्यांत घेवंन 20 एप्रिलाक ते गोंयांत आयले. ताका रितसर अटक करून न्यायालयांत जामिना खातीर उबो केलो तेन्ना ताका 14 दिसांची पुलीस कादय दिली.
मजगतीं, देवेंद्र पाल सिंगान उत्तर गोंय जिल्हो आनी सत्र न्यायालयांत जामिना खातीर केल्ल्या अर्जाचेर आयज (शुक्रार) सुनावणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
