भांगरभूंय | प्रतिनिधी
बाणावलेचे आमदार वेन्झी व्हिएगस हांचो उलो
पणजीः गोंयांत भाजपा सरकारान चलयिल्ल्या गुंडाराजांत सामान्य गोंयकारा वांगडा भाजपाचे कार्यकर्ते आनी मतदार बळी पडल्यात. येवपी डिसेंबरांत झेडपी वेचणुकेंत लोकांनी भाजपाक धडो शिकोवचो. अशें जाल्यारूच वाडटे गुन्यांवगारी घडणुकांचेर सरकार गंभीर जातलें. राज्यपालान वाडट्या गुन्यांवांची गजाल मान्य केल्या आनी लोकांक चत्राय बाळगुवपाक सांगलां, असो दावो बाणावलेचे आमदार वेन्झी व्हिएगस हांणी केला.
वाडटे गुन्यांवकारी घडणुकांचे फाटभूंयेर आम आदमी पक्षाच्या शिश्टमंडळान राज भवनार वचून राज्यपालांक निवेदन भेटोवन हे घडणुकेंत हस्तक्षेप करपाची मागणी केली. ह्या वेळार आमदान व्हिएगस सयत आपचे राष्ट्रीय म्हणयारे वाल्मिकी नायक आनी हेर वावुरपी हजर आशिल्ले.
बायणा, दोनापावल आनी म्हापशें दरोडो, रामा काणकोणकार हल्लो, पेडणें आनी मडकय शुटआवट, मुंगूळ गँगवॉर, पिर्णा मर्डर, साळगांव डबल मर्डर जे गोंयांत पयलीं जाय नाशिल्ले, हे विशींची म्हायती आमी निवेदनांत राज्यपालाक दिल्या, अशें व्हिएगस हांणी सांगलें. राज्यपालान आमचें म्हणणें आयकून वाडटे गुन्यांव मान्य केल्यात आनी आमी सगल्या लोकांनी चत्राय बाळगुची गरज आसा असो उलो मारला. आमी लोकप्रतिनिधी म्हण सादूर रावन हे विशीं आवाज काडपाक जाय अशेंय ते म्हणटात, असो दावो व्हिएगस हांणी केलो.
भाजपाचे गुंडाराज राजकारणांत गोंयकार सुरक्षीत ना. ह्या गुंडाराजांत दरोडे आनी शुटआवट हे घडणुकेंत सामान्य मनीस बळी पडटात.
राज्यपाल संविधानाचे राखणदार आसात आनी ह्यो गजाली योग्य दिकेन मुखार वतल्यो हें तांणी निश्चीतत करचें. एक गृहमंत्री ह्या नात्यान मुख्यमंत्री जीं कामां करपाक जाय तातूंत ते चुकल्यात देखून तुमी हस्तक्षेप करचो अशें राज्यपालान सांगलां. लोकांनी चत्राय बाळगुची. राज्यपाल हातूंत हस्तक्षेप करतले, अशी आस्त वेन्झी हांणी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
