भांगरभूंय | प्रतिनिधी
चल वेगीं आनी सांग रावणाक अंगदा, अंतिम तो विचार कर परतो एकदा…. श्रीरामाचो हो रकाद वालीपुत्र अंगदान् जश्याच्या तसो सांगलो. तीं तिक्ष्ण उतरां आयकुन रावणाक तिडक मारली. तो रागान तांबडो जालो. ताणें आपल्या सचिवाक सांगलें की ह्या मर्कटाक धरात आनी मारून वडयात. तें आयकतकुच सोरोप जसो वेटोळे घालून घट्ट धरता तशे कितलेशेच राक्षस ताका धोंगसुंक लागले. अंगदान तांचे सयत उड्डाण केलें. राजप्रासादाचेर वचून बसलो. सगले राक्षस धडाधड सकयल पळ्ळे.
इंद्रवज्राच्या वजनान जसो हिमालय खचलेलो तसो अंगदाच्या वजनान तो राजप्रासादुच खचलो. ताच्या कळसाक बादा जाली. रागान तापलेल्या रावणान् फाटलो फुडलो विचार करिनासतना आपले सेनेक, झुजा खातीर भायर सरात, असो आदेश दिलो. ताचे फुडे सांगता सांगतां लव- कुश फुड्ले वर्णन करपाक लागले…
नाद येता तो….
अंतराळ भेदून नाद येता तो शंख दुंदुभीचो।
अनुपमेय रणसंग्राम चल्ला शंख रावणाचो ।। धृ ।।
शंख घेवन राक्षस गण ते दिसले।
काळ्या ढगांर ते बगळे सोबले।
तोंडांतसून घडये वीज गर्जले।
रणांगणाचेर पडलो तो पावस बाणांचो ।। 1 ।।
घोडे खिंकळत थय थय नाचता।
हत्ती आड्डटा सूर मेळयता।
घडये नादमय ती भिशणता।
ह्याच आवाजान पदध्वनी मेळटा कपी- राक्षसांचो ।। 2 ।।
वोंठ आपल्या दातांनी धरून।
राक्षसांक ते उडयता मारून।
गगना मेरेन हुडक्यो मारुन।
शस्त्र म्हण ते प्रयोग करता वृक्ष पर्वतांचे ।।3।।
जय दाशरथी जय तारासुत।
वानर प्रहार करता गर्जत।
मार खातानाच पुण शस्त्र उबारीत।
घडये झूज हें चल्लां दिसता महासागराचे।। 4।।
गदा त्रिशुळ वा लागून शस्त्रां तीं।
राक्षस, वानरांक मेळटा मुक्ती।
रक्तान पडल्यात धारातिर्थी।
जय लंकेश अशें आड्डतात शत्रु वानरांचे ।। 5।।
जमीन कोसळटा घोडे पडटात।
बाणार बाण येवन ते पडटात।
हाणा मारा म्होडटा तोडटां।
संहाराचे हे शब्द आयकुपाक येता सगळ्यांचे ।। 6।।
आनंदान रणान मरताना।
रक्ता मासाचीं फुलां फुलतना।
चिड्डटात तीं पायांपोंदां।
रणभूमीर ते व्हाळ व्हांवतात तांबड्या रक्ताचे ।। 7।।
मड्यांचेर मडीं तीं पडटात।
वानर राक्षस मनीस खंय कळटा?
मरणापरस शौर्य भयंकर तें दिसता।
कितल्याश्याच पयस वचून पडटा भाग शरीराचे ।। 8।।
हांतपांय चक्रां शेंपड्यो पडल्या।
शुंडा शिरां गर्दना पावलां।
चिड्डून सगळे खंड खंड जालां?
प्रलय जाल्ल्या भशेन कांपता शरीर धर्तरचें ।। 9।।
द्वंद्व तरी तें खंय कोणाचें?
काळा पासून कोण वांचपाचे?
खंय कोणाचे धड पडपाचें?
धुमशाणान ह्या भान उरलेंना कोणाक कोणाचें ।। 10।।
– उदयबुवा फडके (राष्ट्रीय कीर्तनकार)
97642 43377
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
