भांगरभूंय | प्रतिनिधी
सुग्रीवा धाडस हें असलें, नरेशा हें ना रे तुकां सोबलें… रणनीतिनिपुण श्रीरामान किष्किंधापती सुग्रीवाक असो थंडपणान समजायलो. सुग्रीवाक आपली चूक समजली. ते सगळे सुवेल पर्वतावेल्यान सकयल देवंले. बरो वेळ पळोवन झूज सुरु करपाक श्रीरामान सांगलें. दर्याचे भरती वेळार जशीं व्हडलो आवाज करीत ल्हारां येतात; तसो व्हडल्यान गर्जना करीत ही वानरसेना लंकेचे वाटेन वचपाक लागली. ह्या प्रचंड आवाजान घरां, दोंगर, वेशी, रानां वनां हालपाक लागलीं. आतां झूज सुरवात करचें अशें दिसता आसतनाच राजधर्माचे पालन करप म्हणून श्रीरामान, अंगदाक आपयलो आनी म्हणलें…
कर विचार परत….
चल वेगीं आनी सांग रावणाक अंगदा।
अंतिम तो कर विचार परत एकदा।। धृ।।
महाद्वारार राम आयला दर्या हुपून।
रणरागी वानरगण गेल्यात ते रंगून।
यो शरण रघुवीराक सोडून मदा ।। 1 ।।
ब्रह्माच्या वरान मेळयल्ल्या विसरून बलाक।
पाप्या तुवें पिडले सगल्या संसाराक।
छळ्ळे तुवें देव, नाग, अप्सरां सदां ।। 2 ।।
मद तुजो सोंपोवपाक उबो हांव आसा।
शौर्य भानु राम, सैन्य प्रभा जावन् आसा।
भस्म करतले तुजो वंश राज्य संपदा ।। 3 ।।
शंख नाद पळय धरतरी कांपता।
तुज्या खातीर राक्षस कुळ आयज् सोंपता।
आतां तरी सोड आशा तुजी, घृणास्पदा ।। 4 ।।
आतां तरी सोड मुर्ख वृत्ती तुगेली।
राघवाक दी परतुन देवी मैथली।
शरणागत जा आनी तुं थांबय आपदा ।। 5 ।।
थीर राव रणांगणान् वेळ हो जाणून।
रामबाण तुका सर्गांत वतले ते घेवून।
ह्याच वाटेन मेळटलो तुको मोक्ष मदांधा ।। 6 ।।
ना जाल्यार दाखय मायावी बल तूं रणान्।
जशी सीतेक व्हेल्ली तुवें येवन त्या वनान।
वज्रा वांगडा झुजता बाण मेरु सयत गदा ।। 7 ।।
नाव पासून उरप हांगां कठीण जातलें।
कृपाछत्र रामाचें बिभिषणांक आसतलें।
लंकापती जावन तो बसता राजपदा ।। 8 ।।
– उदयबुवा फडके (राष्ट्रीय कीर्तनकार)
97642 43377
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
