भांगरभूंय | प्रतिनिधी
हीच ती रामाची स्वामिनी, अशी खात्री जावन पसून हनुमान सीतेच्या म्हऱ्यांत वचपाक फाटींफुडें जातालो. तिणें ताका पयलीं केन्नाच पळोवंक नाशिल्लो आनी राम- सुग्रीवाच्या दोस्तीचीय तिका कल्पना नासली. हनुमान विचार करपाक लागलो, घडये तिणें, मायावी रावण समजुन म्हजे कडेन उलोवपाचेंच बंद केले जाल्यार?
अशें सगळें ताच्या मनांत आसतनाच आपल्या सेवकां वांगडा लंकापती रावण थंय आयलो आनी सीतेक भंय दाखोवंक लागलो. सीतेक तिडक आयली. एखादी नागीण जशी फुस्स करून आंगार येता तशी तिडकीन ती रावणाक सांगपाक लागली.
बडबड नाका करूं….
बडबड नाका करूं दशानना निशाचरा।
स्वता राम किर्ती हांव विदित हे सुरासुरां ।।धृ।।
वेदनांक योग्य हांव पर प्रिया पतिव्रता।
जोड पुण्य राक्षसा करून म्हजी मुक्तता।
लज राख स्त्रीची तूं जर खरो तूं, विरा।। 1।।
नरेशा, पाप पळयता, अन्याय हांव सोसतां।
राज्य तें जगांत रे नाममात्र उरता।
कित्याक उजो लावन घेता स्वहस्तान नगरा ।।2।।
जळी थळी दिसता म्हाका लोकनाथ राम तो।
न्हिदस्ता आसतान उश्या पोंदां दावो राम हस्त तो।
मानस पुजेक मनान हाडटां हांव त्या धनुर्धरा ।।3।।
हांवूंच योग्य ताका दुसरी कोण फावना।
परती धाड रे म्हाका रामा कडेन रावणा।
शरणागताक रक्षिता राम अभय दिता, विरा।।4।।
राम सख्य मेळय तूं आनी तूं कृतार्थ जा।
राघवाक दी रे तूं शुद्ध जनकात्मजा।
मृत्युपाश पडटलो ना जाल्यार तुज्या घरा ।।5।।
इंद्रवज्र घडये चुकत केन्ना घाव घालतना।
राम कोप जाल्यार क्षणभर आयु उरचें ना।
रामबाण वृश्टी हो प्रलय जो भयंकरा ।।6।।
जर झुजाक तुज्या फुडे वीर उबो रावलो।
कुल वंश उरचो ना राम सगलें सोंपयतलो।
नीच काममुढ तूं कर विचार वचून घरा।।7।।
रामबाण लागतना पळयतलीं हांव तुका।
काकदृश्टी समान बाण नांव बरयलेलें तुका।
भारमुक्त जावंदी एकदां ही वसुंधरा।।8।।
– उदयबुवा फडके (राष्ट्रीय कीर्तनकार)
97642 43377
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
