भांगरभूंय | प्रतिनिधी
लक्ष्मणा हांगाच तूं बांद मठी…. श्रीरामान सांगिल्ले प्रमाण लक्ष्मणान बड्यो आनी हेर सामान एकठांय केलें आमी चित्रकुटाचेर श्रीरामाश्रम उबो जालो. एका काळया मृगा सयत समंत्रक वास्तुशांत केली. श्रीराम, लक्ष्मण आनी जानकी ह्या तिगांनीय ते कुटींत प्रवेश केलो.
हांगा रामाच्या दुख्खान भकास जाल्ले अयोध्येच्या राजवाड्यांत सुमंतान ओगी रावन प्रवेश केलो. तो आयला हें कळटकच, रडकुऱ्या दोळ्यांनी आनी कांपऱ्या स्वरांत राजा दशरथान विचारलें, ‘सुमंत, म्हज्या रामान वता आसतना तुका कितें म्हणलें? सुमंत सांगपाक लागलो.
उलयलो इतलेंच श्रीराम
शेवटाक करून प्रणाम,
उलयलो इतलेंच म्हाका श्रीराम
वच रे सुमंता अयोध्येक तुं,
पित्याक आमचें कुशल सांग तुं,
म्हजे म्हणून पद वंदन कर तुं,
पितु चरण ते वंदनीय रे, शततीर्थाचें धाम ॥1॥
अंतःपुरान त्यो दोगुय माता,
दुख्खान खूब त्यो आसतल्यो आतां,
धीर दिवन कर तांची शांतता,
बरी आसात आमी सांगुन तांचो,
कर तुं दुख्ख विराम ॥2॥
कौसल्या मातेक सांग तुं क्चुन,
राम सुखी आनी तशीच तुजी सून |
अग्नी पुजा तुं कर मनांतसून,
कानार, तुज्या सदांच पडचो मुनीवरघोशीत साम॥3॥
ज्येश्ठपणाची जाणीव सोडून,
सवती सांगाताक कर समता वर्तन,
पती सेवेन रावची तुं मग्न,
तुजे बगर तो पित्याक ना गे ना दुसरो विश्राम॥4॥
राज धर्म तो हेंच सांगता,
अभिषिक्ताक ते गुण वय नासता,
भरताक त्या तूं मान आतां,
नम्रतायेन सांग तिका हें, सांगुन म्हजे नाम ॥5॥
सांग वचुन तुं कुमार भरता,
जा युवराज आनी स्विकार सत्ता
सगळे प्रजेचेर दवर ममता,
सुखाचो अखंड उपभोग घे तुं पुण मनांन राव निष्काम ॥6॥
तुज्या माथ्यार रे छत्र पित्याचें,
सदांच उतर पाळचें रे तांचें,
सार्थक तांच्या जाणतेपणांचें,
राजनितिचें पालन कर आनी वाढय रघुवंशाचें नाम ॥7॥
कितें तुका सांगचें रे आतां
उदार तु प्रबुद्ध ज्ञाता,
पुत्र वियोगिनी म्हजी रे माता
तुजे करणेन तिका दाखय तुं भरत होच श्रीराम ॥ 8॥
उलयतना श्रीराम गलबललो,
कमलनयन तो दुकांनी भरलो,
करुण दृश्य तें हांव ना विसरलों,
सौमित्रा सयत गंगा तिराचेर उबो जानकी राम॥9॥
– उदयबुवा फडके (राष्ट्रीय कीर्तनकार)
97642 43377
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
