भांगरभूंय | प्रतिनिधी
भारतान दिल्ली टॅस्टीची पयली आपली पकड आनीक घटमूट केली. भारतान आपलो पयलो डाव 518 धांवड्यांचो दोंगर उबारल्या उपरांत घोशीत केलो. ते उपरांत दावखुरो स्पिनर रवींद्र जडेजान तीन विकेटी घेतल्यो. अशे तरेन दुसऱ्या दिसाचो खेळ सोंप मेरेन वॅस्ट इंडिजान 140 धांवड्यांचेर आपल्यो चार विकेटी व्हगडायिल्ल्यो.
ते पयलीं सकाळीं भारतान आपलो डाव मुखार व्हरपाक सुरवात केली, त्या वेळार सगल्यांची नदर यशस्वी जयस्वालाच्या दोट्टी शेंकड्याचेर आशिल्ली. पूण, 175 धांवड्यांचेर वैयक्तीक स्कोराचेर जयस्वालान मिडऑफांत शॉर्ट मारून धांवडी घेवपाच्या यत्नांत धांवबाद जालो. तो बाद जाल्या उपरांत नितीश कुमार रेड्डी खेळपाक धाडलो. ताणें आक्रमक सुरवात केली. पूण, जेवणाच्या विसवा पयलीं तो बाद जालो. भारतान पयल्या सत्रांत 109 धांवड्यो केल्यो.
शुभमन गिलान एक बाजू सांबाळून धरली. ताणें दुसऱ्या सत्रांत शेंकडो पूर्ण केलो. शेंकडो पूर्ण केल्या उपरांत ताणें धांवगती वाडोवपाचो यत्न केलो. दुसरे वटेन आशिल्लो ध्रुव जुरेल (44) अर्द शेंकड्या वटेन पावलां मारतालो, ताचो अर्द शेंकडो पूर्ण जायना फुडें भारत रोखडोच डाव घोशीत करतलो अशे संकेत मेळिल्ले. जुरेल व्हड शॉर्ट मारपाच्या यत्नांत बोल्ड जालो आनी भारतान 5 बाद 518 धांवड्यांचेर डाव घोशीत केलो.
दुसरें सत्र सोंपपाक बरोच वेळ आशिल्ल्यान वॅस्ट इंडिज बॅटिंगेक येवचो पडलो. ताच्या ओपनरांनी सादूरतायेन सुरवात केली. जॉन कॅम्पबेल आनी तेजनारायण चंद्रपॉल ही जोडी सांबाळून बॅटींग करताली. पूण, च्या च्या विसवा पयलीं जडेजान कॅम्पबेलाक बाद करून विंडिजाक पयलो धपको दिलो.
च्या च्या विसवा उपरांत लेगीत विंडिजान सादूरतायेन बॅटींग करप चालूच दवरलें. एेलेक एेथनेज आनी चंद्रपॉल हांणी अर्द शेंकड्याची भागिदारी केली. दोगांयनी फिशालकायेन स्पिनरांक तोंड दिलें. पूण, अखेरेक चंद्रपॉल हो जडेजाचो दुसरो शिकार थारलो. चंद्रपॉल बाद जाल्या उपरांत विंडिजा वयलें चेपण वाडपाक लागलें. एेथनेजाक कुलदीप यादवान बाद केलो. मुखेली रोस्टन चेजाक बाद करून जडेजान आपली तिसरी विकेट घेतली. ते उपरांत शे होप आनी विकेटकीपर बॅट्समन टेविन इमलाक हांणी सांबाळून बॅटींग करीत आनीक विकेटी पडपाक दिल्यो नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
