गिरेस्त लोक देश सोडून वतात….

भांगरभूंय | प्रतिनिधी

देशांतल्या गिरेस्त लोकांचो आंकडो वाडत वता तसो देश सोडून वचपी आनी थंयच स्थायीक जावपी गिरेस्तांचोय आंकडो वाडत आसा, हें तितलेंच खरें. अंदूं स हजारां परस चड गिरेस्त देश सोडून गेल्ल्याचें जाहीर जालां.

संवसारांतल्या ‘लक्ष्मीपुतां’चो आंकडो दरवर्सा वाडत आसा. भारतांतय तो वाडटा. संवसारांतल्या पयल्या धा गिरेस्त लोकां
 मदीं गौतम अदानी, मुकेश अंबानी सारक्या उद्देगपतींचो आस्पाव जावप, ही भारता खातीर अभिमानाची गजाल. देशांतल्या गिरेस्त लोकांचो आंकडो वाडत वता तसो देश सोडून वचपी आनी थंयच स्थायीक जावपी गिरेस्तांचोय आंकडो वाडत आसा, हें तितलेंच खरें. अंदूं स हजारां परस चड गिरेस्त देश सोडून गेल्ल्याचें जाहीर जालां. हे आंकडे हेन्ली प्रायव्हेट वेल्थ मायग्रेशन रिपोर्ट 2023 त आयल्यात. हेन्ली संवसारभर गिरेस्तकायेचेर आनी गुंतवणूक स्थलांतराचेर देखरेख दवरता. हो डेटा तेच संघटनेच्या अहवालांतल्यान भायर सरला. फाटल्या वर्सा हो आंकडो साडेसात हजार आशिल्लो, पूण अंदूं हो आंकडो उणो आसा, पूण गिरेस्त लोक देश सोडून कित्याक वतात, असो प्रस्न उप्रासता.
हांगा जल्मल्ले, ह्या देशांत वाडिल्ले वेवसायीक हांगाच आपलो वेवसाय सुरू करतात आनी ताच्या बळग्याचेर गिरेस्त जातात. ते जेन्ना अतिगिरेस्त वा सुपर रिच ह्या वर्गांत पावतात तेन्ना तांकां भारतांत रावचें अशें दिसना, ही हुस्को करपा सारकी गजाल. ‘सारे जहां से अच्छा हिंदोस्ता हमारा….’ अशें एके कडेन हड्डें फुलोवन म्हणपाचें आनी दुसरे वटेन आपले मालमत्तेचो वापर आपल्या देशा बदलाक परकी देशां खातीर करपाचो ही मानसिकताय गिरेस्त लोकां मदीं (हेर शिक्षीत तरणाट्यां मदींय) बळिश्ट जायत आसा.
परदेशांत वचपी गिरेस्त लोकांक अरब देश, सिंगापूर, इंग्लंड आनी अमेरिका चड पसंत आसा. भारता परस हे देश रावपाक चड योग्य अशें तांकां कित्याक दिसता, हाचेर विचारवंतांनी गंभीरतायेन विचार करपाचो वेळ आयला, खास करून सरकारान!! भारताचे गुंतागुंतीचे कररचणुकेक लागून गिरेस्त देश सोडून वचपाक लागल्यात, अशें म्हण्टात. भारतांतली कररचणूक गुंतागुंतीची आसा अशी कागाळ वेवसायीक करतात. भारताच्या मानान हेर देशांची कर रचणूक सादी आनी लवचीक आसता आनी कर संबंदीत नेमूय सदळ आसतात, देखून आमच्या देशांत तें आपणावप गरजेचें.
दर वर्सा पांच हजारां परस चड गिरेस्त लोक देश सोडून वतात ही गजाल देशाक लजेक घालपी. भारता सारक्या विकसनशील देशाक हें परवडपाचें ना. कारण हांगाच्यान भायर सरतना ते तांची वेवसायीक कुशळटाय, नोकरी निर्माण करपाची संद, कर निर्माण करपाची तांक आनी देशाची संपत्ती वांगडा व्हरतात, देखून गिरेस्त, अति गिरेस्त देश सोडून वच्चे नात हाची जतनाय सरकारान घेवची.
… तर पुण्याचो बिहार जातलो
राजगडाच्या मुळसांतली दर्शना पवाराच्या खूनाची घडणूक ताजी आसतनाच सदाशिव पेठेंत भर दिसा एके तरणाटेचो फाटलाव करून तिचेर कोयतो मारपाची घडणूक हालींच घडली. सगल्यांनी तो व्हिडियो पळयला आसतलो.
एका तरणाट्यान कोयतो काडून घेतिल्ल्यान ते चलयेचो जीव वाटावलो. कांय दिसां भितर ह्यो दोन घडणुको घडिल्ल्यान चलयांचे सुरक्षेचो प्रस्न मुखार आयला. पुणे सारकिल्ल्या देशाची ‘सांस्कृतीक, शिक्षणीक राजधानी’ आशिल्ल्या शारांत हें घडिल्ल्यान पुण्याची मान लजेन बागवल्या. पयलीं पुणें हें चलयां खातीर सुरक्षीत शार मानताले, पूण फाटल्या कांय वर्सां सावन पुण्याची ही वळख पुसून वचपाक लागल्या. पुण्यां सगळ्या तरांचें उच्च शिक्षण दिवपी ‘एक से बढकर एक’ संस्था आसात. सावित्रीबाई फुले पुणे विद्यापीठ तर संवसारांतय फामाद आसा. इतलेंच न्हय, एमपीएससी, यूपीएससी सारकिल्या स्पर्धात्मक परिक्षेक बसपी विद्यार्थ्यांक मार्गदर्शन करपी जायत्यो संस्था पुण्यांत आसात, देखून पुण्यांत उच्च शिक्षण घेवपा खातीर देशभरांतल्यान विद्यार्थी येतात, जातूंत चलयांचो आंकडो लक्षणीय आसा. अभ्यासक्रम पुराय करपाक उण्यांत उणें चार ते पांच वर्सां लागतात. त्या वेळार हे विद्यार्थी पुण्यां रावतात. हॉस्टेलांत वा भाड्यान रुम घेवन चार- पाच विद्यार्थी एकठांय रावतात.
विद्यार्थ्यांची इश्टागत जाता आनी केन्ना- केन्ना ती मोगांत रुपांतरीत जाता. कुटुंबा पासून पयस आशिल्ल्यान तांचेर नियंत्रण दवरपी कोणूच नासता. कांय वेळार तांचे मदीं वाद जाता, मागीर बॉलिवूड सिनेमांतल्या ‘तू मेरी नही हो सकती, तो किसी की नही हो सकती’ ह्या डायलाॅगा प्रमाण चले चलयांक त्रास दितात आनी अशे तरेचे घडणुको घडटात.
हल्लो जाल्ल्यो दोनूय चलयो एमपीएससींत शिकताल्यो जाल्यार दर्शना पवार एमपीएससीची परिक्षा पास जावन राना अधिकारी जाल्ली. खरें म्हणल्यार आमी कित्या खातीर आयल्यात आनी आमचें ध्येय कितें तें विद्यार्थ्यांनी विसरूंक फावना, कोणे तरी ह्या विद्यार्थ्यांक समजावचें की आमी एका खिणाच्या प्रलोभना खातीर जिविताचें भस्म करतात. शिक्षकांनी, समाजान, सरकार, प्रशासनान हे खातीर फुडाकार घेवचो. ह्यो घडणुको चालू उरल्यार पालक भुरग्यांक दुसऱ्या गांवांनी शिकपाक, नोकरेक धाडचे नात.
पुण्याची वळख ही सुसंस्कृत शार म्हूण आसा. ताचेर आतां प्रस्नचिन्न लागलां. कारण पुण्यांत गुन्यांवांचे प्रमाण खूब वाडलां. कोयतो गॅंगान तर पुण्यांत दहशत निर्माण केल्या. सकाळीं, दनपरां भर रस्त्यार चलयांक मारतात हाचो अर्थ हल्लेखोरांक कायद्याची भिरांत ना. गुन्यांवकारांनी कितेंय केलें तरी कायदो तांकां कांयच करूंक शकना अशें तरणाट्यांक दिसूंक लागलां. गुन्यांवकार पुलिसांक भियेनात. पूण अश्यो घडणुको घडप ही पुलिसांक लज. पुण्यां गुन्यांव अशे वाडत रावले जाल्यार फुडाराक पुणें बिहार जावंक शकता, तेन्ना पुलिसांनी खर पावलां उबारचीं. हल्लेखोरांक खर ख्यास्त दिवची. गुन्यांवकारांक कायद्याचो भंय दिसलो जाल्यारूच ‘सभ्य लोकांचें सुसंस्कृत पुणे’ हें नांव उरतलें, नाजाल्यार पुण्याचो बिहार जातलो.

श्याम ठाणेदार
9922546295