भांगरभूंय | प्रतिनिधी
देशाचो आंवाठ जितलो ल्हान, लोकसंख्या जितली उणी तितलो तो देश वेगान उदरगत करता, अशें म्हणटात. सदांच हें प्रत्यक्षांत येना. देशांतले मनीस हुशार, मेहनती, नितळ मनाचे, स्वावलंबी, दुसऱ्यांक रोजगार दिवपी, मेकळ्या विचारांचे आसतात. तांचीं सरकारां सर्वांगी उदरगतीचेर लक्ष केंद्रीत करपी आसतात, तेन्नाच तो देश वयर सरता. सगल्या नागरिकां मदीं एकजूटय म्हत्वाची. हेर गजालीं परस बेकारी, गुन्यांव, गैरकारभार, गैरप्रकार, भ्रश्टाचार, म्हारगाय हांचेर चड नियंत्रण आसप गरजेचें. नाजाल्यार उदरगत संतुळीत जायना. गरीब आनीक गरीब जायत रावतात, गिरेस्त आनीक गिरेस्त. तांचे मदलें देगण, विशमताय वाडतूच वता. लोकांच्या राहणिमानाचो पांवडो सुदारपाचो वावर हें तशें ‘राॅकेट सायन्स’ न्हय, तांकां शिक्षण, रोजगार, साधनसुविधा दिल्यो, गुन्यांवकारी, म्हारगायेचेर नियंत्रण दवरलें जाल्यार उदरगतीचो ग्राफ वयर सरपाक वेळ लागना!
स्वित्झरलॅण्डांत सोमाराच्यान संवसारीक अर्थीक मंचाची बसका सुरू जाल्या. तातूंत ऑक्सफॅमाच्या अहवालांत कांय धपको दिवपी निश्कर्श मांडल्यात. 2020 वर्सां सावन आयज मेरेन संवसारांतल्या पांच सगल्यांत गिरेस्त उद्देगपतींची मालमत्ता दुपेटी परस चड वाडल्या. दुसरे वटेन सगल्यांत उणें उत्पन्न आशिल्ल्या पांचशें कोटी लोकांचे मालमत्तेंत 0.2 टक्के उणाव आयला…. आनी ही विशमताय, गिरेस्त- गरिबां मदलें देगण ह्याच वेगान वाडत रावलें जाल्यार संवसारांतली गरिबी, दळडीरपण आनीक 229 वर्सां तरी सोंपचें ना खंय!! संवसारांतल्या गिरेस्तांचें उत्पन्न म्हारगायेचे तुळेन तिपेटीन वाडलां. हे गिरेस्त म्हणल्यार जांचे कडेन उणीच 1 कोटी रुपयांची मालमत्ता आनी वर्सुकी उत्पन्न 20 लाख रुपया आसा ते. पयले पांच गिरेस्त कोण ताची उमळशीक सगल्यांकूच आसतली. तांचीं नांवां एलन मस्क, बर्नार्ड अर्नोल्ट, जेफ बेजोस, लॅरी एलिसन आनी मार्क झुकेरबर्ग. हें चड गिरेस्त. पूण ह्या आनी संवसारांतल्या हेर 1 टक्के गिरेस्तां कडेन 59 टक्के संपत्त आसा. म्हणल्यार उरिल्ल्या 99 टक्के लोकां कडेन 41 टक्के रक्कम जाली. ही असंतुळा सोंपोवपा खातीर सरकारांनी, अर्थतज्ञांनी यत्न करपाक जाय.
संवसारांतल्या कर्मचाऱ्यांच्या राहणिमानांत फाटल्या चार वर्सांत कांयच बदल जावंक ना, अशें इनइक्वॅलिटी इंकच्या अहवालांत म्हणलां. चार वर्सां पयलीं ते जशे जगताले, तशेंच आयज जगतात. हाचे फाटल्यान म्हारगाय हें मुखेल कारण आसा. कोरोना काळांत लोक भिकेक लागपाचो वेळ आयलो. मात कांय लोकांनी सदचे परस चड मालमत्ता जोडली, हाच्यो खबरो सगल्यांनी वाचल्याच आसतल्यो. म्हारगाये कडेन तुळा केल्यार गिरेस्तांचें उत्पन्न तीन पटींनी वाडलां, अशें हो अहवाल म्हणटा. बरें फुडाराक तरी गरिबांक, मध्यमवर्गींयांक बरे दीस येतले? एआय नांवाचो राकेस आयलो. तो दरदिसा विकसीत जायत आसा. आयएमएफ कंपनीची संचालक क्रिस्तालिना जाॅर्जिव्हा हिणें हो धोको हे परिशदेंत उक्तायला. ती म्हणटा, एक तर कामाचे पद्दतींत बदल जातलो वा 40 टक्के नोकऱ्यो वतल्यो. म्हणटकच म्हाका हें अॅप तें साॅफ्टवॅर वापरूंक जमना, हें कळना, तें कळना अशी पिरपीर लावप्यांक सगल्यांत व्हडलो धोको आसा.
आमच्या निती आयोगाचो अहवाल आयला. तो मात संवसाराच्या उरफाटो आसा, अशें म्हणचें पडटलें. भारतांत फाटल्या णव वर्सांत 24.8 कोटी लोक गरिबींतल्यान भायर सरले. हातूंतले 5.94 कोटी लोक उत्तर प्रदेशांतले. बिहारांतले 3.77 कोटी, मध्य प्रदेशांतले 2.30 कोटी आनी राजस्थानांतले 1.87 कोटी. ह्या लोकांची ‘गरिबी पातळी’ सुदारल्या, अशें निती आयोगान म्हणला. ही भारतीयां खातीर खोशेची गजाल म्हणची पडटली. 2013-14 वर्सा गरिबीचें प्रमाण 29.17 टक्क्यां वयल्यान 2022- 23 वर्सा 11.28 टक्क्यांचेर पावलां. हाचो अर्थ फुडल्या 30 वर्सांनी एकलोय भारतीय गरीब उरचो ना. लोकांच्यो जिणेशैली बदलीत जाल्यार म्हारगाय आनी पर्यायान गरिबी नियंत्रणा खाला हाडूं येता. अन्न सुरक्षा येवजणेक लागून तशेंच उज्ज्वला, जल जीवन आनी आवास येवजणे लागून गरिबांची परिस्थिती बदल्ल्या अशें निती आयोग सांगता. आफ्रिके सारक्या खंडांतले देश सोडले जाल्यार आमच्या भारतांत चड गरिबी आसा. मात तीं आतां ना जावपाक लागल्या, अशें दिसता. संवसारांतलीय गरिबी सोंपपाक जाय. ते खातीर सगल्या देशांक हातांत हात घालून वावुरचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
